جے پور میں چلایا گیا ’آپریشن کلین سوئپ‘، خاتون سمیت 26 افراد گرفتار

جےپور: راجستھان کے دارالحکومت جے پور میں ڈرگس مافیاؤں کے خلاف چلائے گئے دو روزہ آپریشن کلین سویپ مہم کے تحت 25 معاملہ درج کرکے خاتون سمیت 26 ملزمین کو گرفتار کیا ہے۔ پولیس کمشنر آنند شری واستو نے بتایا کہ جے پور شہرمیں منشیات گانجا، اسمیک، غیر قانونی شراب کی اسمگلنگ کر کے جے پور میں سپلائی اور فروخت کرنے میں منشیات فروش سرگرم ہیں۔ جن کے خلاف گزشتہ 18 فروری سے دو روزہ آپریشن کلن سویپ مہم چلائی گئی۔

اس آپریشن کے لیے تشکیل شدہ ٹیم نے مخبروں کے ذریعہ مکمل معلومات حاصل کی اور پھر سبھی تھانوں سے رابطہ کیا گیا، اس کے بعد پولیس تھانہ کرنی وہا، کردھنی، چیمو، ہرماڈا، جھوٹواڑا، بھانکروٹا، ٹرانسپورٹ نگر، جواہر نگر، بسی، کانوتا، سانگانیر، پرتاپ نگر، مانسروور، شپرا پتھ، موہانا، سانگا نیر صدر، شیوداس پورا، مانک چیک، برہمپوری اور جے پوری تھانوں کی ٹیم کے ذریعہ کارروائی کرتے ہوئے خاتون سمیت کل 26 اسمگلروں کو گرفتار کیا گیا۔ پولیس نے گرفتار ملزمین کے قبضے سے سات کلو 252 گرام گانجا،11.87 ملی گرام چرس، 6.39 ملی گرام اسمیک، 322 غیر قانونی انگریزی دیسی شراب کے پاؤچ ، دو ایکٹیوا اسکوٹی اور 5337 روپے برآمد کرکے ضبط کیے گئے۔