اب سسودیا کو گرفتار کرنے کی سازش، پی ایم ہمیں ایک ساتھ ہی گرفتار کرا لیں! کیجریوال کا بیان

نئی دہلی: دہلی کے وزیر اعلی اروند کیجریوال نے بڑا دعویٰ کرتے ہوئے الزام عائد کیا کہ وزیر صحت ستیندر جین کے بعد اب منیش سسودیا کو فرضی مقدمہ میں پھنسانے کی سازش کی جا رہی ہے۔ اروند کیجریوال کی بدھ کے روز وزیر صحت ستیندر جین کی گرفتاری کے تعلق سے بلائی گئی پریس کانفرنس سے یہ دعویٰ کیا۔

کیجریوال نے کہا کہ وہ نہیں جانتے کہ ستیندر جین کو گرفتار کرنے کے پیچھے کیا مقصد ہے لیکن اب نائب وزیر اعلیٰ منیش سسودیا کو گرفتار کرنے کی سازش رچی جا رہی ہے۔ کیجریوال نے کہا کہ اگر ستیندر جین اور منیش سسودیا بدعنوان ہیں تو نہیں معلوم ایماندار کون ہوگا! کیجریوال نے کہا کہ ستیندر جین کا مقدمہ پہلے سے چل رہا ہے، اب پھر سے تفتیش کی جا رہی ہے۔

وزیر اعلی کیجریوال نے کہا کہ ’’میں ہاتھ جوڑ کر وزیر اعظم مودی سے درخواست کرتا ہوں کہ ایک ایک کرکے گرفتاریاں نہ کریں، اس سے دہلی کے ترقیاتی کام متاثر ہوتے ہیں۔ اس سے بہتر ہے کہ دہلی کے تمام وزرا اور ارکان اسمبلی کو بیک وقت گرفتار کرا کے تفتیش کرا لی جائے۔ الگ الگ گرفتار کرنے سے ملک کا نقصان ہوتا ہے۔ ستیندر جین محکمہ کلینک بنا رہے تھے، پانی کی صفائی کرا رہے تھے، اب یہ سب کام روک گیا ہے۔‘‘

کیجریوال نے کہا ’’مجھے نہیں معلوم کہ یہ گرفتاری کیوں ہو رہی ہے۔ کچھ کا کہنا ہے کہ ہماچل پردیش میں ہونے والے اسمبلی انتخابات کی وجہ سے ایسا ہو رہا ہے۔ کچھ لوگ کہتے ہیں کہ اس طرح پنجاب الیکشن میں عآپ کی جیت کا بدلہ لیا جا رہا ہے۔ ہم گرفتاری سے نہیں ڈرتے لیکن سب کو ایک ساتھ گرفتار کرا لیا جائے۔ انہوں نے کہا ’’ہم ہر جگہ مذاق میں کہتے ہیں کہ مودی جی سے ایمانداری کا سرٹیفکیٹ لے کر آئے ہیں، آپ سب کو گرفتار کر لیجئے، ایک بار پھر ایمانداری کا سرٹیفکیٹ لے کر نکلیں گے۔‘‘