یو پی روڈویز کی بسوں میں اب ’کیش لیس‘ سفر کرنا ممکن، ڈیبٹ کارڈ اور کریڈٹ کارڈ سے خریدے جا سکیں گے ٹکٹ

لکھنؤ: اتر پردیش کی روڈویز بسوں میں جلد ہی کیش لیس ٹکٹ دستیاب ہوگا۔ اسٹیٹ روڈ ٹرانسپورٹ کارپوریشن نے ای ٹکٹنگ کا نظام ریاست بھر میں نافذ کرنے کا فیصلہ کیا ہے۔ اس نظام کے ذریعے بس کے اندر ہی مسافر یو پی آئی، ڈیبٹ کارڈ یا کریڈٹ کارڈ کے ذریعے ٹکٹ خرید سکیں گے۔ انہیں ٹکٹ کے لئے نقد رقم کی ضرورت نہیں ہوگی اور وہ آن لائن یا کارڈ کے ذریعے بھی ٹکٹ خرید سکیں گے۔ اس کی آزمائش شروع کر دی گئی ہے اور یکم اکتوبر سے اس نظام کو باضابطہ طور پر شروع کر دیا گیا ہے۔

یوپی اسٹیٹ روڈ ٹرانسپورٹ کارپوریشن کے ایم ڈی سنجے کمار نے کہا کہ روڈ ویز نے محکمہ میں ٹیکنالوجی کو شامل کرنے کا فیصلہ کیا ہے۔ اب تک روڈ ویز کی بسوں میں مشینوں کے ذریعے مینوئل ٹکٹ دیئے جا رہے تھے لیکن اب جلد ہی نئی مشینوں کے ذریعے ٹکٹوں کی تقسیم شروع ہو جائے گی۔ ان نئی مشینوں کے استعمال کے لیے متعلقہ افراد کو تربیت دی جا رہی ہے۔ مشینوں کے ذریعے ٹکٹ بغیر نقدی کے خریدے جا سکتے ہیں۔ لوگ یو پی آئی یا والیٹ کے ذریعے کرایہ ادا کر سکیں گے۔ نیز، ڈیبٹ یا کریڈٹ کارڈز کو ٹیپ یا سویپ کر کے ٹکٹ خریدے جا سکتے ہیں۔

سنجے کمار نے کہا کہ نئے نظام نافذ ہونے کے بعد مسافروں کو ٹکٹ لینے کے لئے کیش رکھنے کی ضرورت نہیں رہے گی۔ اس کے علاوہ کنڈکٹر کی کھلے پیسے دینے کی پریشانی بھی ختم ہو جائے گی۔ تاہم جو لوگ کیش کے ذریعے ٹکٹ خریدنا چاہیں گے، ان کے لئے پرانے نظام سے بھی ٹکٹ دستیاب کرائے جائیں گے۔

ایم ڈی سنجے کمار کے مطابق نئے نظام سے شفافیت میں اضافہ ہوگا اور مسافروں کے علاوہ محکمہ کا کام بھی بہت آسان ہو جائے گا۔ ای ٹکٹنگ سسٹم کو ایک سافٹ ویئر کے ذریعے کنکٹ کیا جائے گا، جس کا کنٹرول تمام آر ایم اور اے آر ایم کے پاس ہوگا۔ اس سسٹم سے وہ جان سکیں گے کہ بس میں کتنے مسافر بیٹھے ہیں۔ اب کنڈکٹر کو یہ نہیں بتانا پڑے گا کہ اس نے کتنے ٹکٹ کاٹے ہیں، کیونکہ یہ سارا عمل آن لائن ہوگا۔

اس کے علاوہ مسافروں کی دیگر سہولیات میں بھی اضافہ کیا جا رہا ہے۔ محکمہ اسمارٹ کارڈز کو فروغ دے رہا ہے، جسے ٹکٹ خریدنے کے لیے ٹیپ کیا جا سکتا ہے۔ معذور افراد کے لیے ایک خاص قسم کا اسمارٹ کارڈ دیا جائے گا۔ اس کے علاوہ ملازمین کے لیے ای ٹی آئی ایم ایس بھی پیش کیا جا رہا ہے جو کہ ایک مربوط پلیٹ فارم ہے۔ اس کے تحت تمام ملازمین کا مکمل ڈیٹا ایک جگہ پر دستیاب ہوگا۔

سنجے کمار کے مطابق نان ٹکٹنگ ریونیو ایک فیصد سے کم ہے، جسے کم کر کے 3 سے 4 فیصد تک لانے کا ہدف ہے۔ اس کے لیے بس اسٹینڈز پر اے ٹی ایم، موبائل ٹاور، کینٹین، بسوں پر اشتہارات جیسے وسائل کا استعمال کیا جائے گا۔