سدھارتھ نگر میں نااہل کسانوں پر کسا شکنجہ، 2600 سے زائد کو بھیجا گیا نوٹس

پی ایم کسان سمان ندھی یوجنا کا فائدہ اٹھانے والے نااہل کسانوں پر یوپی حکومت کا شکنجہ دن بہ دن کستا جا رہا ہے۔ اس منصوبہ کا فائدہ اٹھا رہے کسان پریشان ہیں کہ انتظامیہ کے ذریعہ بھیجے گئے نوٹس کے بعد اب وہ کیا کریں۔ سدھارتھ نگر کے کسانوں میں بھی اس وقت سے ہلچل پیدا ہو گئی ہے جب 2600 سے زائد نااہل کسانوں کو محکمہ زراعت نے نوٹس بھیج دیا۔ سدھارتھ نگر میں مجموعی طور پر 4.5 لاکھ کسان کنبے ہیں جن میں سے تین لاکھ 77 ہزار کسان کنبے اس منصوبہ سے فائدہ اٹھا رہے ہیں۔ 2600 سے زائد کسانوں کو نوٹس بھیجے جانے کے بعد ضلع کے دیگر کسان کنبوں میں بھی تشویش پیدا ہو گئی ہے۔

قابل ذکر ہے کہ یوپی میں پی ایم کسان سمان ندھی یوجنا کا فائدہ اٹھانے والے نااہل کسانوں سے وصولی کا عمل شروع ہو چکا ہے۔ اب تک نااہل کسانوں سے 5 لاکھ روپے کی وصولی ہونے کی خبریں بھی سامنے آ چکی ہیں۔ محکمہ زراعت کو نااہل کسانوں سے مجموعی طور پر ایک کروڑ 90 لاکھ روپے کی وصولی کرنی ہے۔ اس ہدف کو پورا کرنے کے لیے محکمہ جی جان سے لگ گیا ہے۔ گاؤں گاؤں گھوم کر محکمہ زراعت کے اہلکار جانچ کر رہے ہیں اور امکان ظاہر کیا جا رہا ہے کہ نااہل کسانوں کی تعداد میں اضافہ بھی ہو سکتا ہے۔ اس معاملے میں ضلع کے ڈپٹی ایگریکلچر ڈائریکٹر نے بتایا کہ انکم ٹیکس ریٹرن بھر رہے کسانوں کو سب سے پہلے نوٹس بھیجا گیا ہے۔

افسران کا کہنا ہے کہ پی ایم سمان ندھی یوجنا کے شرائط کو سامنے رکھتے ہوئے گاؤں گاؤں جا کر تصدیق کا عمل تیز کیا جائے گا۔ ان کے مطابق بہت سے لوگ جو خط افلاس سے اوپر زندگی گزار کر رہے ہیں، وہ بھی کسان سمان ندھی کا فائدہ اٹھا رہے ہیں۔ یکم مئی سے 30 جون تک سبھی لوگوں کی جانچ مکمل ہو جائے گی۔ اگر نااہل کسان نوٹس جاری ہونے کے بعد بھی پیسے واپس نہیں کرتے تو آر سی جاری کر وصولی کا عمل انجام دیا جائے گا۔