اب کرناٹک میں نہیں ہوگا نیٹ امتحان، تنازعہ کے درمیان کابینہ سے نئے بل کو منظوری
نیٹ پیپر لیک کو لے کر ملک بھر میں مظاہرے ہو رہے ہیں اور کئی ریاستوں میں، اس میڈیکل داخلہ امتحان کو ختم کرنے کا مطالبہ بھی اٹھایا گیا ہے۔ کرناٹک حکومت نے اس پر فیصلہ بھی لے لیا ہے
![<div class="paragraphs"><p>نیٹ امتحان میں دھاندلی کے خلاف احتجاج / قومی آواز / وپن</p></div>](https://media.assettype.com/qaumiawaz%2F2024-06%2F4c9b8ca0-64b7-4102-8734-1e81ed419725%2Fneet_scam.jpg?rect=0%2C25%2C4000%2C2250&auto=format%2Ccompress&fmt=webp)
نیٹ امتحان میں دھاندلی کے خلاف احتجاج / قومی آواز / وپن
بنگلورو: نیٹ کے حوالہ سے ملک بھر میں جاری ہنگامہ آرائی کے درمیان حکومت کرناٹک نے فیصلہ کیا ہے کہ اب وہ ریاست میں اس میڈیکل داخلہ امتحان کو منعقد کرنے کی اجازت نہیں دے گی۔ نیٹ پیپر لیک کے تنازعہ کے درمیان کرناٹک ایک کی کابینہ نے نیا بل منظور کر لیا ہے۔ کانگریس کی قیادت والی کرناٹک حکومت تمل ناڈو کے بعد نیٹ کو منسوخ کرنے کی تجویز کے بل کو منظوری دینے والی دوسری ریاستی حکومت بن گئی ہے۔
کرناٹک میں منظور کیا گیا بل نیٹ کے بجائے کچھ اور میڈیکل داخلہ امتحان منعقد کرنے یا نیٹ کو کرناٹک میں کامن انٹرینس ٹیسٹ (سی ای ٹی) سے جوڑنے کی تجویز ہے۔ یہ بل کرناٹک قانون ساز اسمبلی میں پیش کیا جائے گا۔ اس میں حکومت سے درخواست کی گئی ہے کہ ریاست 12ویں جماعت کے نمبروں کی بنیاد پر میڈیکل کورسز میں داخلے کی اجازت دے۔ نیٹ لاگو ہونے سے پہلے میڈیکل کالجوں میں داخلے اسی طریقے سے ہوتے تھے۔
کرناٹک حکومت کی طرف سے یہ فیصلہ ایسے وقت میں لیا گیا ہے جب نیٹ-یو جی امتحان میں مبینہ پیپر لیک کو لے کر پورے ملک میں ہنگامہ ہے۔ اگر یہ بل ریاستی اسمبلی سے منظور ہو جاتا ہے، تو طلباء کو کرناٹک کے میڈیکل کالجوں میں انڈرگریجویٹ اور پوسٹ گریجویٹ کورسز میں داخلے کے لیے ریاستی مسابقتی امتحان میں شرکت کرنا ہوگی اور انہیں نیٹ سے آزادی ملے گی۔ تاہم، یہ ابھی تک واضح نہیں ہے کہ نیٹ کی جگہ لینے والے امتحان کو کیا کہا جائے گا۔
پچھلے مہینے دراوڑ منیترا کزگم (ڈی ایم کے) کی قیادت والی تمل ناڈو حکومت نے بھی نیٹ کے خلاف ایک قرارداد منظور کی تھی۔ ڈی ایم کے حکومت نے مرکز سے کہا تھا کہ وہ ریاستی حکومتوں کو میڈیکل کورسز میں داخلہ لینے کی اجازت دے۔ کئی علاقائی پارٹیاں بشمول مانیتھنیا مکل کاچی، مارومالارچی دراوڑ منیترا کزگم، تاملگا ویٹری کزگم اور کمیونسٹ پارٹی آف انڈیا (مارکسسٹ) نے بھی ڈی ایم کے حکومت کی تجویز کی حمایت کی۔
ڈی ایم کے ایم پی کے کنی موزی نے خبر رساں ایجنسی اے این آئی سے بات کرتے ہوئے کہا، ’’تمل ناڈو مسلسل کہہ رہا ہے کہ ہمیں نیٹ نہیں چاہیے، اب یہ ثابت ہو گیا ہے کہ نیٹ ایک منصفانہ امتحان نہیں ہے اور اس کی وجہ سے طلباء کو کافی نقصان ہو رہا ہے۔ ہم چاہتے ہیں کہ نیٹ کو ختم کر دیا جائے اور صدر نے ابھی اس پر دستخط کرنا ہیں۔‘‘
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔