ٹیچر کی بیوی سے کوئی رشتہ نہیں تھا، بچوں کو مارنا میری غلطی تھی: امیٹھی واقعہ کے ملزم چندن کا بیان

امیٹھی قتل کیس کے ملزم چندن ورما اب پولیس کی حراست میں ہیں۔ اس معاملے میں نت نئے انکشافات ہو رہے ہیں۔ ملزم چندن ورما پہلی بار میڈیا کے کیمروں کے سامنے آیا اور اس نے کہا کہ  اس کا ٹیچر کی بیوی سے  کوئی محبت کا رشتہ نہیں تھا، حالانکہ بچوں کو مارنا اس کی غلطی تھی جس کا  اسے افسوس ہے۔ بچوں کو قتل کرنے کے حوالے سے ملزم کا کہنا تھا کہ غلطی ہوگئی۔ درحقیقت ملزم چندن ورما کو گرفتار کرنے کے بعد پولیس نے دعویٰ کیا تھا کہ ملزم کے ٹیچر  کی بیوی کے ساتھ محبت کے تعلقات تھے۔

ملزم چندن نے امیٹھی میں ایک ٹیچر، اس کی بیوی اور دو نابالغ بچوں کو گولی مار کر ہلاک کر دیا تھا۔ اس واقعہ کے بعد پولیس نے ملزم کو جمعہ کی رات نوئیڈا کے ایک ٹول پلازہ کے قریب سے اس وقت گرفتار کیا جب وہ دہلی فرار ہو رہا تھا۔ ملزم کی گرفتاری کے بعد پولیس نے پریس کانفرنس کرتے ہوئے کہا کہ واقعے کی تحقیقات کے لیے فوری طور پر 5 ٹیمیں تعینات کر دی گئی ہیں۔ ملزم کے تعلق سے کہا گیا تھا کہ اس کا مقتول  کی بیوی کے ساتھ معاشقہ چل رہا تھا۔ دونوں کے تعلقات میں گزشتہ کچھ دنوں سے تلخی آ رہی تھی۔

ورما کو ہفتہ کی اولین ساعتوں میں اس وقت ٹانگ میں گولی لگی جب پولیس اس کے کہنے پر قتل میں استعمال کی گئی پستول برآمد کرنے گئی تھی۔ اس دوران ملزم پولیس اہلکار کی پستول چھین کر بھاگنے کی کوشش کر رہا تھا کہ پولیس نے اسے ٹانگ میں گولی مار دی۔

ٹیچر سنیل کمار (35)، ان کی بیوی پونم (32)، بیٹی درشٹی (6) اور ایک سالہ بیٹی سنی کو گولی مار کر قتل کر دیا تھا یہ لوگ امیٹھی کے شیو رتن گنج تھانہ علاقے کے احوروا بھوانی چوراہے پر کرائے کے مکان میں رہتے تھے ۔ کہا جا رہا ہے کہ جمعرات کی شام کو. پورے خاندان کو قتل کرنے کے بعد ملزم چندن نے خود کو گولی مارنے کی کوشش کی تھی۔ ملزم واردات کے وقت اتنا غصے میں تھا کہ جو بھی سامنے آتا اسے گولی مار دیتا۔

گرفتاری سے قبل ملزم چندن ورما کے واٹس ایپ اسٹیٹس نے سب کو حیران کردیا تھا۔ چندن نے اسٹیٹس میں لکھا تھا کہ 'پانچ لوگ مرنے والے ہیں، میں آپ کو جلد دکھاؤں گا۔' معلومات کے مطابق جرم کرنے کے بعد چندن ورما خود کو گولی مارنا چاہتا تھا۔ غالباً اسی لیے اس نے اپنے سٹیٹس پر 5 لوگوں کو مارنے کا لکھا تھا۔