پٹرول-ڈیزل کی بڑھتی قیمتوں کے خلاف اسمرتی ایرانی کی رہائش پر یوتھ کانگریس کا مظاہرہ

نئی دہلی: انڈین یوتھ کانگریس نے مرکزی وزیر اسمرتی ایرانی کی رہائش گاہ کے باہر مہنگائی، پٹرول، ڈیزل اور گیس سلنڈر کی بڑھتی قیمتوں کے خلاف احتجاج کیا۔ اس موقع پر سینکڑوں کانگریس کارکن موجود رہے اور حکومت کے خلاف شدید نعرے بازی کی۔ یوتھ کانگریس کے قومی صدر سرینواس بی وی نے کہا، "اسمریتی ایرانی جب حزب اختلاف میں تھیں تو پٹرول، ڈیزل اور ایل پی جی میں 5 روپے کے اضافے کے خلاف سڑکوں پر اتر جایا کرتی تھیں اور آواز بلند کرتے ہوئے نظر آتی تھیں۔ لیکن آج جب ہر طرف مہنگائی ہے، تو وہ خاموش ہیں، یوتھ کانگریس نے آج انہیں نیند سے بیدار کرنے کی کوشش کی ہے۔‘‘

انہوں نے مزید کہا کہ ’’ملک کے کئی شہروں میں پٹرول کے دام 100 روپے فی لیٹر سے تجاوز کر چکے ہیں، ڈیزل 90 روپے کو عبور کرچکا ہے اور گیس سلنڈر کی قیمتیں بھی دن بدن بڑھتی جارہی ہیں، شرمناک بات یہ ہے کہ اتنی کھلی لوٹ مار کے باوجود بی جے پی حکومت اس کا ذمہ دار بھی کانگریس کو ٹھہرا کر خود صاف دامن بچا کر نکل جانا چاہتی ہے۔

انڈین یوتھ کانگریس کے مطابق کسان، نوجوان، مزدور، کاروباری اور خواتین مہنگائی سے بری طرح متاثر ہو رہے ہیں لیکن آر ایس ایس اور بی جے پی کو اس سے کوئی فرق نہیں پڑ رہا ہے۔ آر ایس ایس اور بی جے پی کا عوام دشمن اور ملک دشمن چہرہ سامنے آ گیا ہے۔

انڈین یوتھ کانگریس کے صدر سرینواس نے وزیر پٹرولیم کے حالیہ بیان پر، جس میں انہوں نے ٹھنڈے موسم کو پٹرول اور ڈیزل کی قیمتوں سے منسوب کیا ہے، کو ایک بے تکا بیان قرار دیتے ہوئے ان کے وزارتی عہدے سے استعفیٰ دینے اور مرکزی حکومت سے پٹرول، ڈیزل اور قیمتوں میں کمی لانے کا مطالبہ کیا ہے۔