پڑوسی کے گھر جا کر چائے مانگی، پھر 2 بے گناہ بچوں کو قتل کردیا،علاقہ میں کشیدگی،ملزم انکاؤنٹرمیں ڈھیر

سنسنی خیز قتل کیس سے یوپی کا بدایوں ہل گیا ہے۔ بدایوں کی  بابا کالونی میں ایک شخص نے دو بچوں کو قتل کردیا۔ اس کے بعد وہ بھاگ گیا۔ واقعہ کی اطلاع ملنے پر پولیس نے ملزم کو پکڑنے کی کوشش کی تو اس نے فائرنگ شروع کر دی۔ پولیس نے بھی جوابی کارروائی کی جس میں وہ مارا گیا۔ اس واقعہ کے بعد علاقے میں کشیدگی  پھیل گئی۔ پولیس اور انتظامیہ نے امن قائم کرنے کی اپیل کی ہے۔

نیوز پورٹل ’آج تک ‘ پر شائع خبر کے مطابق بدایوں کے ڈی ایم منوج کمار نے بتایا کہ پولیس کو اطلاع ملی کہ منڈی کمیٹی چوکی کے قریب بابا کالونی میں ایک شخص نے ایک گھر میں گھس کر دو چھوٹے بچوں کو قتل کردیا۔ اس کے بعد لوگوں میں خوف و ہراس پھیل گیا۔ لوگوں سے امن برقرار رکھنے کو کہا گیا ہے۔ دونوں بچوں کی لاشیں پوسٹ مارٹم کے لیے بھیج دی گئی ہیں۔ قتل کی وجہ تاحال واضح نہیں ہوسکی ہے۔ ملزم پولیس مقابلے میں مارا گیا ہے۔ معاملے کی جانچ جاری ہے۔

بریلی کے آئی جی راکیش کمار نے بتایا کہ اس واقعہ کی اطلاع ملنے کے بعد پولیس کی ٹیم موقع پر پہنچ گئی۔ ملزم وہاں سے بھاگنے کی کوشش کر رہا تھا۔ پولیس کو دیکھتے ہی اس نے فائرنگ شروع کر دی۔ اس کے بعد وہ جوابی کارروائی میں مارا گیا۔ ملزم نےموقع پر ہی دم توڑ گیا۔ ملزم کی عمر 25 سے 30 سال کے درمیان بتائی جاتی  ہے۔ اس حملے میں دو بچے مارے گئے ہیں۔ ایک بچہ شدید زخمی ہے۔ اسے علاج کے لیے اسپتال میں داخل کرایا گیا ہے۔

ڈی جی پی پرشانت کمار نے بتایا کہ یہ واقعہ منگل کی شام آٹھ بجے پیش آیا۔ ساجد نامی شخص اس کی دکان کے سامنے ونود سنگھ کے گھر گیا ہوا تھا۔ اس  نے ونود کی بیوی سے چائے بنانے کو کہا۔ اچانک ونود کے تین بچوں پر جان لیوا حملہ ہوا۔ اس نے کلہاڑی کے وار سے دو بچوں کو قتل کر دیا۔ تیسرے بچے کو چوٹ لگی ہے۔ واقعے کے بعد ملزم پولیس مقابلے میں مارا گیا۔

معلومات کے مطابق ونود کمار سنگھ بابا کالونی میں رہتا ہے۔ اس کی بیوی گھر میں پارلر چلاتی ہے۔ وہ اپنے 3 بچوں کے ساتھ گھر میں اکیلی تھی۔ ساجد اپنے گھر کے سامنے سیلون چلاتا ہے۔ منگل کو وہ اپنی دکان بند کر کے جلدی چلا گیا۔ لیکن شام کو ونود کے گھر آیا۔ پہلے تعارف کی وجہ سے ونود کی بیوی اس کے لیے چائے بنانے چلی گئی۔ اس کے بعد وہ چپکے سے گھر کی چھت پر چلا گیا، جہاں بچے کھیل رہے تھے۔

ساجد نے مبینہ طور پر ونود کے تین بچوں 12 سالہ آیوش، 8 سالہ آہان اور  یوراج  پر کلہاڑی سے حملہ کیا۔ اس میں آیوش اور آہان کی موت ہوگئی، جب کہ یوراج کو زخمی ہونے کے بعد اسپتال لے جایا گیا۔ یہ واقعہ سول لائنز تھانے کی منڈی پولیس چوکی سے چند قدم کے فاصلے پر پیش آیا۔ اس واقعہ کے بعد اہل خانہ اور علاقہ مکینوں نے دکانوں میں توڑ پھوڑ کی اور ایک موٹر سائیکل کو نقصان پہنچایا۔