این سی پی – ایس پی نے جاری کی اپنی تیسری فہرست، ستارا اور راویر سے امیدواروں کا اعلان

این سی پی-شردپوار نے لوک سبھا انتخابات کے لیے امیدواروں کی اپنی تیسری فہرست جاری کر دی ہے۔ شرد پوار نے اس فہرست میں دو ناموں کا اعلان کیا ہے۔ ششی کانت شندے کو ستارا سیٹ سے جبکہ شری رام پاٹل کو راویر کی سیٹ سے امیدوار بنایا ہے۔ پارٹی نے یہ فہرست کل مہا وکاس اگھاڑی (ایم وی اے) کی پریس کانفرنس کے بعد جاری کی ہے۔

کل ایم وی اے نے سیٹ شیئرنگ کے حوالے سے ایک پریس کانفرنس کی تھی جس میں کون سی پارٹی کتنی اور کن سیٹوں پر الیکشن لڑے گی؟ اس کا اعلان کیا گیا تھا۔ اس سے پہلے بھی شرد پوار نے دو فہرستیں جاری کی تھیں اور آج شرد پوار نے مزید دو سیٹوں پر امیدوار کھڑے کیے ہیں۔ ایم وی اے کے درمیان سیٹوں کی تقسیم کے تحت مہاراشٹر میں شیو سینا-یو بی ٹی 21 سیٹوں پر الیکشن لڑے گی، کانگریس 17 سیٹوں پر اور این سی پی-ایس پی 10 سیٹوں پر الیکشن لڑے گی۔

پارٹی نے اپنی تیسری فہرست جاری کرتے ہوئے سوشل میڈیا پیلٹ فارم ’ایکس‘ پر کہا ہے کہ ’’توتاری کے ذریعے دہلی میں مہاراشٹر کی آواز مزید بلند کرنے کے لیے ’نیشنلسٹ کانگریس پارٹی – شرد چندر پوار‘ کی مرکزی پارلیمانی بورڈ نے لوک سبھا انتخابات 2024 کی تیسری فہرست جاری کی ہے۔ چلئے، محترم شرد چندر جی پوار صاحب کے ساتھ خدمات، عزت و احترام اور وقار کے نظریات کی روایت کو مضبوط کریں۔‘‘ اسی کے ساتھ پارٹی نے اپنے پہلے کے اعلان شدہ 7 امیدواروں کے ساتھ ستارا اور راویر کے امیدواروں پر مشتمل اپنی تیسری فہرست جاری کی ہے۔