بہار: میونسپل الیکشن اکتوبر کے دوسرے عشرے میں کرائے جانے کا امکان

بہار میں میونسپل الیکشن دو مراحل میں دسہرا اور دیوالی کے درمیان کرائے جا سکتے ہیں۔ میونسپل الیکشن کے پیش نظر 10 اور 20 اکتوبر کی تاریخ ووٹنگ کے لیے طے ہو سکتی ہے۔ ریاستی انتخابی کمیشن دسہرا کے بعد اور دیوالی کے پہلے دو مراحل میں میونسپل انتخاب مکمل کرائے جانے کو لے کر تیاریوں میں مصروف ہے۔ کہا جا رہا ہے کہ یہ تیاری بھی آخری مرحلہ میں ہے۔

بتایا جاتا ہے کہ ریاستی انتخابی کمیشن نے سبھی اضلاع کو ہدایت دی ہے کہ پہلے مرحلہ کی ووٹنگ کے لیے 8 اکتوبر تک بیلٹ یونٹ میں بیلٹ پیپر لگا کر تیار کر لیں۔ ساتھ ہی دوسرے مرحلہ میں استعمال کیے جانے والے ای وی ایم میں 18 اکتوبر تک بیلٹ یونٹ ’بیلٹ پیپر‘ کے ساتھ تیار کرنے کو کہا گیا ہے۔ واضح رہے کہ 5 اکتوبر کو وجیہ دشمی ہے، جب کہ 24 اکتوبر کو دیوالی کا تہوار ہے۔

الیکشن کمیشن نے یہ بھی ہدایت دی ہے کہ اہم اشخاص کے نام نہیں چھوٹے ہونے سے متعلق رجسٹریشن افسر سے سرٹیفکیٹ حاصل کر کمیشن کو بھیجی جائے۔ 30 اگست سے 5 ستمبر تک ضلعوں کو ترمیم شدہ ووٹر لسٹ کی اشاعت کرانی ہوگی۔ کمیشن نے کمیونکیشن پلان تیار کرنے کے لیے 5 ستمبر تک تاریخ مقرر کی ہے، جب کہ ضلع سطح پر انتخاب کرانے والے افسران اور بوتھوں کے نزدیک رہنے والے ووٹرس کا نام، موبائل نمبر کا کام 7 ستمبر سے 20 ستمبر تک مکمل کر لیا جائے۔

ریاستی الیکشن کمیشن نے سبھی ضلعوں سے سیکورٹی فورسز کی دستیابی کی رپورٹ جمعرات تک دستیاب کرانے کی ہدایت دی تھی۔ ریاستی انتخابی کمیشن ریاست کی 224 مگر پالیکاؤں کے 4874 وارڈوں کی ووٹنگ کرانے کی تیاری میں ہے۔ اس کے لیے 14043 بوتھوں کا قیام کیا گیا ہے۔