ممبئی شمال مغربی لوک سبھا سیٹ تنازعہ پرشیوسینا-یوبی ٹی کا عدالت جانے کا اعلان، ریٹرنگ آفیسر پر دھاندلی کا الزام

ادھو ٹھاکرے کی زیرقیادت شیو سینا نے ممبئی شمال مغربی لوک سبھا سیٹ کے ریٹرننگ افسر کے خلاف عدالت جانے کا اعلان کیا ہے۔ پارٹی نے کہا ہے کہ ریٹرننگ آفیسر نے ’غیر قانونی طریقے‘ سے ایکناتھ شندے کی شیو سینا کے امیدوار کو صرف 48 ووٹوں سے فاتح قرار دیا ہے اور اس معاملے میں دھاندلی کیا ہے۔ شیوسینا-یو بی ٹی کے لیڈر انیل پراب نے الزام لگایا ہے کہ ریٹرننگ آفیسر وندنا سوریہ ونشی گنتی کے عمل میں شفافیت برقرار رکھنے میں ناکام رہیں۔

انل پرب کے مطابق گنتی کے 19ویں دور تک سب کچھ ٹھیک تھا، مگر جب روندر وائیکر پیچھے رہنے لگے تو ریٹرننگ آفیسر نے گنتی کے ایجنٹوں کے ساتھ ڈیٹا شیئر کرنا بند کر دیا۔ اس کے علاوہ گنتی کی میزوں کو دور رکھا گیا تھا، جہاں امیدواروں کے کاؤنٹنگ ایجنٹ تفصیلات دیکھنے کے لیے پہنچنے سے قاصر تھے۔ اس عمل میں بہت زیادہ رازداری برتی گئی تھی جس سے بے ضابطگی کا شبہ پیدا ہوتا ہے۔ شیو سینا-یو بی ٹی لیڈر انیل پرب نے کہا کہ ای وی ایم کی گنتی میں ان کی پارٹی کا امیدوار ایک ووٹ سے آگے تھا۔ اس کے بعد دوبارہ گنتی ہوئی۔ ریٹرننگ آفیسر کے پاس کچھ فون آئے تھے اور وہ دباؤ میں نظر آ رہی تھیں۔ انہوں نے ہمیں اپنے تحفظات کا اظہار کرنے کا بھی وقت نہیں دیا۔

واضح رہے کہ ممبئی کے شمال مغربی لوک سبھا حلقہ میں ایک ای وی ایم کی مبینہ ہیکنگ کو لے کر ایک تنازعہ کھڑا ہو گیا ہے۔ ریٹرننگ آفیسر وندنا سوریہ ونشی نے ای وی ایم ہیکنگ کے الزامات کو مسترد کیا ہے۔ انہوں نے کہا ہے کہ ای وی ایم کو ہیک نہیں کیا جا سکتا۔ ای وی ایم ایک اسٹینڈالون نان پروگرامیبل ڈیوائس ہے جسے ان لاک کرنے کے لیے کسی موبائل او ٹی پی کی ضرورت نہیں ہوتی ہے۔