ممبئی: یومِ عاشورہ جلوس کے پیش نظر حفاظتی انتطامات کے تئیں پولیس کمربستہ، شر پسندوں کے خلاف ہوگی سخت کارروائی

ممبئی: ممبئی میں شیعہ برادری کی مختلف جماعتوں اور تنظیموں کے الحاق سے زینبیہ امام باڑہ بھنڈی بازار سے یوم عاشورہ کا تاریخی اور روایتی جلوس برآمد ہوتا ہے۔ اس جلوس میں ممبئی، مضافات اور بیرون شہر کے عقیدت مند لاکھوں کی تعداد میں شریک ہوتے ہیں اور غمِ حسین کو مناتے ہیں۔

ممبئی میں یومِ عاشورہ کے اس روایتی جلوس کے پیشِ نظر ممبئی پولیس نے سخت حفاظتی انتظامات کرنے کا دعوی کیا ہے۔ اس کے ساتھ ہی مسلکی تصادم کے خدشہ کے اندیشہ کو دیکھتے ہوئے بھی پولیس الرٹ ہو گئی ہے۔ اگر کوئی بھی فرقہ پرست عناصر حالات خراب کرنے کی کوشش کرتا ہے تو پولیس اس پر سخت کارروائی کرے گی۔

ممبئی پولیس کمشنر وویک پھنسلکر کا کہنا ہے کہ شوشل میڈیا پر متنازع مشمولات کو شیئر کرنے اور حالات بگاڑنے والوں پر سخت نظر رکھی جائے گی اور ان کے خلاف کاروائی کی جائے گی۔ انھوں نے کہا کہ سوشل میڈیا پر مسلکی تصادم جیسے حالات پیدا کرنے والوں کو کسی بھی حال میں بخشا نہیں جائے گا۔ ممبئی پولیس کمشنر وویک پھنسلکر نے یومِ عاشورہ کے جلوس کے پیشِ نظر اشتعال انگیز اور متنازع نعرہ بازی پر کارروائی سمیت کئی اہم احکامات جاری کیے ہیں۔