مختار انصاری کی بیوی، بیٹا اور سالا مفرور قرار، گھر پر قرقی کا نوٹس چسپاں

مئو ضلع کی پولیس نے زور آور لیڈر مختار انصاری کی بیوی، بیٹے اور سالے کو مفرور قرار دے دیا ہے۔ ان کے خلاف ضلع کے تین تھانوں میں کیس درج کر ان کی تلاش کی جا رہی ہے۔ مختار انصاری کے آبائی ضلع غازی پور کے سبھی ٹھکانوں پر چھاپہ ماری کی گئی ہے لیکن ان کی بیوی، بیٹے اور سالے میں سے کسی کا پتہ نہیں چل سکا ہے۔ بالآخر پولیس نے دروازے پر نوٹس چسپاں کر دیا ہے۔

ایس پی اویناش پانڈے کا کہنا ہے کہ مفرور لوگوں سے گزارش نہیں کی گئی ہے بلکہ انھیں متنبہ کیا گیا ہے کہ اگر وہ عدالت کے سامنے پیش نہیں ہوتے تو پھر قانون کے مطابق سخت کارروائی کی جائے گی۔ انھوں نے بتایا کہ مختار انصاری کی بیوی افشاں انصاری اور ان کے رکن اسمبلی بیٹے عباس انصاری کے خلاف مختلف معاملوں میں کیس درج کیے گئے ہیں۔ عدالت میں پیش کرنے کے لیے غازی پور کے چار مقامات پر چھاپہ ماری کی گئی، لیکن ان کا کنبہ فرار ہے۔

اویناش پانڈے نے بتایا کہ ہتھیار لائسنس کے معاملے میں عدالت نے مختار کے بیٹے عباس انصاری کو سمن جاری کیا تھا، لیکن وہ عدالت میں پیش نہیں ہوئے۔ اس کے بعد این بی ڈبلیو جاری کیا گیا ہے۔ این بی ڈبلیو کے مطابق نوٹس پر عمل نہیں کیا گیا جس کے بعد عدالت نے بھگوڑا قرار دے دیا۔ پولیس سپرنٹنڈنٹ نے بتایا کہ مختار انصاری کے دو سالے شرجیل رضا اور انور شہزاد کے خلاف بھی این بی ڈبلیو جاری کیا گیا تھا۔ اگر یہ عدالتی حکم پر عمل نہیں کرتے تو سخت قانونی کارروائی کی جائے گی۔ انھوں نے یہ بھی کہا کہ اگر قانون پر عمل شروع ہوا تو ان کی ملکیت کی قرقی کی جائے گی۔