مختار عباس راجیہ سبھا کے بعد لوک سبھا کے بھی امیدوار نہیں، عہدہ وزارت سے رخصتی کے آثار!

نئی دہلی: بھارتیہ جنتا پارٹی (بی جے پی) نے اتر پردیش کی دو لوک سبھا سیٹوں کے ضمنی انتخابات کے لئے امیدواروں کا اعلان کر دیا ہے اور مختار عباس نقوی کو ٹکٹ نہیں دیا گیا ہے۔ دراصل، مختار عباس نقوی مرکزی وزیر ہیں اور ان کی راجیہ سبھا کی مدت کار ختم ہو چکی ہے، اگر اگلے چھ مہینے تک وہ لوک سبھا یا راجیہ سبھا کے رکن منتخب نہیں ہوتے تو انہیں عہدہ وزارت سے رخصت ہونا پڑے گا۔ مختار عباس کو رام پور سے ٹکٹ دیئے جانے کا امکان ظاہر کیا جا رہا تھا لیکن ایسا نہیں ہوا، جس کے بعد ان کے عہدہ وزارت سے رخصت ہونے کے آثار نظر آ رہے ہیں!

خیال رہے کہ بی جے پی نے اعظم گڑھ سے دنیش لال یادو نرہوا اور رام پور لوک سبھا سیٹ سے گھنشیام لودھی کو امیدوار بنایا ہے۔ ان دو لوک سبھا سیٹوں کے علاوہ بی جے پی نے ہفتہ کو دہلی، آندھرا پردیش، تریپورہ اور جھارکھنڈ کی سات اسمبلی سیٹوں کے ضمنی انتخابات کے لیے اپنے امیدواروں کی فہرست جاری کر دی۔

بی جے پی کے جنرل سکریٹری ارون سنگھ نے کہا کہ پارٹی کی سنٹرل الیکشن کمیٹی نے 2022 کے لوک سبھا اور اسمبلی ضمنی انتخابات کے لیے ان ناموں کو منظوری دے دی ہے۔ تریپورہ کے وزیر اعلیٰ پروفیسر مانک ساہا کو ٹاؤن بوردولی سے ٹکٹ دیا گیا ہے۔ اگرتلہ سے ڈاکٹر اشوک سنہا، سورما (محفوظ) سے سوپنا داس پال اور جبراج نگر سے ملینا دیبناتھ، آندھرا پردیش کی آتمکر سیٹ سے گندلاپلی بھرت کمار یادو، دہلی کی راجندر نگر سیٹ سے راجیش بھاٹیہ اور جھارکھنڈ کی مندر (محفوظ ) سے گنگوتری کجور کو امیدوار اعلان کیا گیا ہے۔

اعظم گڑھ لوک سبھا سیٹ سماج وادی پارٹی کے صدر اکھلیش یادو اور رام پور سیٹ محمد اعظم خان کے استعفیٰ سے خالی ہوئی ہے۔ دنیش لال یادو کو 2019 کے عام انتخابات میں بھی اعظم گڑھ سیٹ سے امیدوار بنایا گیا تھا۔

(یو این آئی ان پٹ کے ساتھ)