’انتخابات زندگی سے زیادہ اہم ہوگئے ہیں‘ یوکرین میں طالب علم کی موت پر رکن پارلیمنٹ کا پھوٹا غصہ

یوکرین پر روسی حملے کے دوران خار کیف میں فائرنگ کے دوران ایک نوین نامی ہندوستانی طالب علم کی موت ہوگئی ہے۔ طالب علم کی موت کے بعد تمام سیاسی جماعتوں نے مرکزی حکومت کو تنقید کا نشانہ بنایا ہے۔ ناگور سے نیشنل لوک تانترک پارٹی کے قومی کنوینر ہنومان بینی وال نے کہا ہے کہ اگر مرکزی حکومت بروقت چوکس ہوتی اور یوکرین سے ہندوستانی طلباء کو نکالتی تو آج ہزاروں جانیں خطرے میں نہ پڑتیں۔

رکن پارلیمنٹ ہنومان بینی وال نے کہا کہ اب تک وہاں سے بہت کم طلباء کو واپس لایا گیا ہے جب کہ یوکرین کے مختلف حصوں میں 20 ہزار سے زائد طلباء کا تعلق راجستھان سمیت دیگر ریاستوں سے ہے۔ انہوں نے کہا کہ یوکرین میں ہندوستانی طالب علم کی موت بھی مرکز کی ناکامی کا حصہ ہے، کیونکہ حکومت اتر پردیش سمیت دیگر ریاستوں کے انتخابات میں مصروف تھی۔

رکن پارلیمنٹ ہنومان بینی وال نے کہا کہ ’’مرکز نے انتخابات کو یوکرین میں پھنسے ہندوستانی طلبہ کی جانوں سے زیادہ اہم سمجھا‘‘۔ انہوں نے کہا کہ حکومت مرکز کے کچھ وزراء کو یوکرین کے سرحدی ممالک میں بھیج کر دکھاوا کرنے سے بہتر ہوتا کہ حکومت وہاں سے تمام طلباء کو بروقت ہندوستان واپس لاتی۔

واضح رہے کہ مہلوک ہندوستانی طالب علم کی شناخت کرناٹک کے ہاویری ضلع کے نوین ایس جی کے طور پر ہوئی ہے۔ طالب علم کی عمر 21 سال تھی۔ نوین خار کیف میں ایم بی بی ایس کی تعلیم حاصل کر رہا تھا اور ذرائع کے مطابق اس کے والد کی نوکری ختم ہو گئی تھی اور وہ کھیتی باڑی کر کے اپنا گزارا کر رہے ہیں اور نوین کا تعلیم ختم کرنے کا وقت ایک سال سے بھی کم رہ گیا تھا۔