موسم کا حال: دہلی این سی آر میں مزید بارشوں کی پیش گوئی، ہوا سے ہوگا سردی میں اضافہ

نئی دہلی: کڑاکے کی سردی کے درمیان قومی راجدھانی خطہ میں بدھ کے بعد جمعرات کو بھی بارش ہوئی۔ مختلف علاقوں میں ہلکی سے درمیانے درجے کی شدت کے اور گرج چمک کے ساتھ برسات ہوئی۔ بدھ کی صبح سے جاری اس بارش کے سبب دہلی میں سڑکیں مسدود ہو گئیں اور جگہ جگہ پانی بھر گیا۔

دہلی میں بارشوں کے سبب لوگوں کو شدید سردی سے کچھ راحت ضرور مل گئی ہے۔ جمعرات کو کم از کم درجہ حرارت 12.3 اور زیادہ سے زیادہ درجہ حرارت 18.6 ڈگری سیلسیس ریکارڈ کیا گیا۔ وہیں محکمہ موسمیات کا کہنا ہے کہ جمعہ کو کم از کم درجہ حرارت 12 اور زیادہ سے زیادہ درجہ حرارت 19 ڈگری سیلسیس رہنے کا امکان ہے۔

محکمہ موسمیات نے پیشن گوئی کی ہے کہ جمعہ کو ایک مرتبہ پھر دھند کی واپسی ہو سکتی ہے۔ ساتھ ہی سردی میں بھی اضافہ ہو سکتا ہے۔ لہذا دہلی والوں کو فی الحال نہ تو سردی سے راحت ملنے کی توقع ہے اور نہ ہی دھند سے۔

جمعہ کی راحت کے بعد دہلی میں ہفتہ سے دوبارہ بارش ہو سکتی ہے۔ بارش کے ساتھ ساتھ یہاں درجہ حرارت بھی گرنے کا امکان ہے۔ ایسے میں دہلی کے لوگ ایک ساتھ سردی اور بارش کی زد میں آنے والے ہیں۔ فروری کے پہلے ہفتے میں موسم کی پیشن گوئی کے بارے میں بات کریں تو فی الحال دہلی اور اس کے آس پاس کے علاقوں میں رہنے والے لوگوں کے لئے سردی اور دھند سے راحت کی کوئی امید نہیں ہے اور مجموعی طور پر جنوری جیسی سردی کا سامنا رہے گا۔