عآپ کے سنجے سنگھ راجیہ سبھا سے معطل، اب تک اپوزیشن کے 24 ارکان پارلیمنٹ پر ہو چکی معطلی کی کارروائی

نئی دہلی: عام آدمی پارٹی کے رکن پارلیمنٹ سنجے سنگھ کو باقی ہفتے کے لیے راجیہ سبھا سے معطل کر دیا گیا ہے۔ ان پر نعرے بازی لگانے اور چیئرمین کی کرسی پر کاغذ پھینکنے کا الزام ہے۔ سنجے سنگھ 24ویں ایسے رکن پارلیمنٹ ہیں جنہیں موجودہ مانسون اجلاس کے دوران معطل کیا گیا ہے۔

ڈپٹی چیئرمین ہری ونش نارائن سنگھ نے کہا کہ عام آدمی پارٹی کے راجیہ سبھا رکن نے کل ایوان میں نعرے بازی کی تھی اور چیئرمین کی کرسی پر کاغذ پھاڑ کر پھینکا تھا۔ انہیں اس ہفتے کے باقی دنوں کے لیے ایوان سے معطل کر دیا گیا ہے۔ انہوں نے مزید کہا کہ کل سنجے سنگھ نے ہمارے ڈیجیٹل لائیو کے دوران بتایا تھا کہ انہوں نے کاغذ پھینکا تھا۔

خیال رہے کہ گزشتہ روز راجیہ سبھا کے 19 ارکان کو اس ہفتے کے لیے معطل کیا گیا ہے۔ جن ارکان کو معطل کیا گیا ہے ان میں موسم نور، ایل یادو، وی سیواداسن، ابیر رنجن بسواس، سشمتا دیو، شانتا چھتری، محمد عبداللہ، اے اے رحیم، کنی موجی، ڈاکٹر شانتنو سین، ندیم الحق اور ڈولا سین شامل ہیں۔ ان ارکان اسمبلی کو ویل میں داخل ہو کر نعرے لگانے پر معطل کیا گیا ہے۔

اس سے ایک روز قبل کانگریس کے 4 ارکان پارلیمنٹ کو لوک سبھا سے بھی معطل کیا گیا تھا۔ پارلیمنٹ کا مانسون اجلاس لگاتار ہنگامہ کی نذر ہو رہا ہے۔ حزب اختلاف کی جانب سے مہنگائی، بے روزگاری، جی ایس ٹی کے خلاف نعرے بازی کرتے ہوئے بحث کا مطالبہ کیا جا رہا ہے۔ لوک سبھا کے اسپیکر اوم برلا نے خبردار کیا تھا کہ کسی بھی رکن پارلیمنٹ کو پلے کارڈ لے کر ایوان کی کارروائی میں حصہ لینے کی اجازت نہیں دی جائے گی۔