پٹنہ میں بھی منکی پوکس! مشتبہ مریض کے گھر پہنچی ڈاکٹروں کی ٹیم، محکمہ الرٹ

ڈبلیو ایچ او کے ذریعہ منکی پوکس سے متعلق الرٹ جاری کیے جانے کے بعد ہندوستان میں منکی پوکس کے بڑھتے معاملوں سے دہشت کا ماحول ہے۔ بہار میں بھی منکی پوکس کے ایک مشتبہ مریض کے بارے میں پتہ چلا ہے۔ میڈیا رپورٹس کے مطابق پٹنہ میں ایک خاتون منکی پوکس میں مبتلا ہو گئی ہے۔ متاثرہ خاتون پٹنہ سٹی کے گرہٹا علاقہ کی رہنے والی ہے۔ بہار میں منکی پوکس کے اس پہلے معاملے کا پتہ چلنے کے بعد محکمہ صحت میں ہنگامہ برپا ہو گیا ہے۔ حالانکہ محکمہ اسے اب تک مشتبہ مان رہا ہے، لیکن ڈاکٹروں کا کہنا ہے کہ خاتون میں منکی پوکس سے متعلق سبھی علامتیں موجود ہیں۔

پی ایم سی ایچ کی ٹیم سیمپل لینے کے لیے گرہٹا واقع خاتون کی رہائش پر پہنچ گئی ہے۔ محکمہ صحت کی ٹیم پورے معاملے کی جانچ کر رہی ہے۔ حالانکہ ہندوستان میں منکی پوکس کے اب تک 4 مریض ہی سامنے آئے ہیں، لیکن اس معاملے میں طبی عملہ مستعد نظر آ رہا ہے۔ منکی پوکس کا ایک معاملہ دہلی میں اور تین معاملہ کیرالہ میں سامنے آیا ہے۔

واضح رہے کہ منکی پوکس کو لے کر ملکی سطح پر الرٹ جاری کر دیا گیا ہے۔ بہار میں ریاستی سطح پر بھی اس معاملے کو لے کر الرٹ ہے۔ مرکزی حکومت سے ملی گائیڈلائن کو سبھی طبی اہلکاروں کو بھیجا جا چکا ہے۔ گائیڈلائن کے مطابق سبھی ڈاکٹرس، آشا اور اے این ایم کو منکی پوکس کی علامتوں کے بارے میں ٹھیک سے بتانے کی ہدایت دی گئی ہے۔

گائیڈلائن میں کہا گیا ہے کہ اے این ایم یا آشا کو کسی مریض میں یہ علامت ملے تو وہ فوراً اس کی اطلاع محکمہ صحت کو دے۔ منکی پوکس کے بارے میں بتایا جاتا ہے کہ یہ ایک خطرناک وائرس ہے جو مویشیوں سے انسانوں میں پھیلتا ہے اور ایک شخص سے دوسرے شخص میں بھی پھیل سکتا ہے۔ جلد، آنکھ، ناک یا منھ کے ذریعہ سے یہ وائرس انسان کے جسم میں داخل ہوتا ہے۔