’مودی میجک ختم ہو رہا، جیت کے لیے پولرائزیشن کا ہوا استعمال‘، انتخابی نتائج کے بعد ادھیر رنجن چودھری کا تبصرہ

ہماچل پردیش اور گجرات اسمبلی انتخابات کے نتائج سامنے آنے کے بعد لوک سبھا میں حزب مخالف لیڈر ادھیر رنجن چودھری نے بی جے پی کو تنقید کا نشانہ بنایا ہے۔ انھوں نے اپنے بیان میں کہا ہے کہ ’’اب مودی میجک ختم ہو رہا ہے۔ جیت کے لیے پارٹی کو پولرائزیشن کا استعمال کرنا پڑ رہا ہے۔‘‘ انھوں نے مزید کہا کہ ’’مودی جی کو اس انتخاب سے سبق لینا چاہیے۔ تین الیکشن لڑے گئے جن میں سے ایک میں کامیابی ملی۔ گجرات میں گھر گھر گئے، اتنا ترقی یافتہ ہونے کے باوجود وہ (پی ایم مودی) گھر گھر کیوں گئے؟ انھیں فرقہ واراہن پولرائزیشن کی ضرورت پڑی۔ لیکن مودی جی کا میجک دور جا رہا ہے۔‘‘

ہماچل پردیش انتخابی نتائج کا تذکرہ کرتے ہوئے ادھیر رنجن نے کہا کہ ’’اگنی ویر کو بڑھا چڑھا کر دکھایا تو اب ہماچل میں کیا ہوا؟‘‘ پی ایم مودی کو تنقید کا نشانہ بناتے ہوئے ادھیر رنجن کہتے ہیں کہ ’’راہل جی سے ان کا مقابلہ 2024 میں ہوگا۔ مودی جی چاہتے ہیں وہ ہندوستان میں گرو بنیں اور باقی سب چیلا بنیں۔ مودی جی راہل گاندھی سے ڈرتے ہیں، کیونکہ کوئی سر اٹھا کر اگر بات کرتا ہے تو وہ ہیں ہمارے لیڈر راہل گاندھی۔‘‘

ادھیر رنجن چودھری نے اس دوران لداخ میں چینی فوج کی دراندازہ کا بھی تذکرہ کیا اور پی ایم مودی کو کٹہرے میں کھڑا کر دیا۔ انھوں نے کہا کہ لداخ میں چینی فوج نے دراندازی کی اور رہائشی سہولیات کے ساتھ 200 سے زیادہ پناہ گاہیں بنائیں۔ اب ہماری فوج کو دور کے علاقوں میں گشت کرنے کی اجازت نہیں ہے۔ اگر ایسا ہی چلتا رہا تو سیاچن گلیشیر میں حالات کشیدہ ہو سکتے ہیں۔ یہ ضروری ہے کہ حکومت جی-20 کا ذکر کرنے کی جگہ ہند-چین ایشو پر (پارلیمنٹ میں) بحث کرے۔