وزارتی عہدوں پر بی جے پی سے جلد بات ہوگی، افواہوں پر کان نہ دھریں، شیو سینا کے باغی ایکناتھ شندے کا ٹوئٹ

نئی دہلی: مہاراشٹر میں جاری سیاسی بحران کے درمیان ادھو ٹھاکرے نے وزیر اعلیٰ کے عہدے سے استعفی دے دیا ہے اور نئی حکومت تشکیل دینے کے حوالہ سے بی جے پی اور شندے دھڑے نے حرکت میں آنا شروع کر دیا ہے۔ دریں اثنا، شیوسینا کے باغی لیڈر ایکناتھ شندے نے کہا ہے کہ ابھی حکومت سازی کے پیش نظر کون سے اور کتنے وزارتی عہدے ہوں گے اس سلسلے میں بی جے پی سے تبادلہ خیال نہیں ہوا ہے، تاہم اس پر جد بات کی جائے گی۔

ایکناتھ شندے نے ٹوئٹ کرتے ہوئے بتایا کہ جلد ہی تمام پہلوؤں پر تبادلہ خیال کیا جائے گا، اس وقت تک برائے مہربانی وزرا کی فہرست اور اس کے بارے میں افواہوں پر یقین نہ کریں۔

خیال رہے کہ گزشتہ شام ادھو ٹھاکرے نے وزیر اعلیٰ کے عہدے سے استعفی کا اعلان کر دیا، جس کے فوراً بعد بی جے پی میں جشن کی شروعات ہو گئی۔ ممبئی کے تاج ہوٹل میں بی جے پی لیڈران مٹھائی تقسیم کرتے اور نعرے لگاتے نظر آئے۔ بی جے پی لیڈر دیویندر فڈنویس بھی مٹھائی کھاتے ہوئے نظر آئے۔

بی جے پی کی مہاراشٹر یونٹ کے سربراہ چندرکانت پاٹل نے بدھ کی شب کہا کہ پارٹی کے لیڈر دیویندر فڈنویس اور شیو سینا کے باغی لیڈر ایکناتھ شندے اب مستقبل کی حکمت عملی تیار کریں گے۔ ریاست کی بی جے پی یونٹ نے اپنے تمام قانون سازوں کو ممبئی میں جمع ہونے کی ہدایت دی ہے۔