کسانوں کی حمایت میں کھڑے ہوئے پدم شری اور ارجن ایوارڈ یافتہ کئی کھلاڑی، ایوارڈ واپسی کا فیصلہ

زرعی قوانین کے خلاف کسانوں کی جاری تحریک کو آج اس وقت ایک بڑی طاقت ملی جب پدم شری اور ارجن ایوارڈ یافتہ کئی کھلاڑیوں نے کسانوں کے حق میں آواز بلند کرتے ہوئے ایوارڈ واپسی کا اعلان کر دیا۔ یہ کھلاڑی ’دہلی کوچ‘ کے دوران مظاہرین کسان پر طاقت کے استعمال کے خلاف اپنا احتجاج درج کرتے ہوئے انعامات کی واپسی کا عزم ظاہر کیا ہے۔

میڈیا ذرائع سے موصول ہو رہی خبروں کے مطابق پدم شری اور ارجن ایوارڈ یافتہ پہلوان کرتار سنگھ، ارجن ایوارڈ یافتہ باسکیٹ بال کھلاڑی سجن سنگھ چیما اور ارجن ایوارڈ یافتہ ہاکی کھلاڑی راجبیر کور ان کھلاڑیوں میں شامل ہیں جنھوں نے ایوارڈ واپسی کا اعلان کیا ہے۔ ان کھلاڑیوں کا کہنا ہے کہ آئندہ 5 دسمبر کو وہ دہلی پہنچیں گے اور راشٹرپتی بھون کے باہر اپنا ’ایوارڈ‘ رکھ کر چھوڑ دیں گے۔

مذکورہ کھلاڑیوں نے دہلی کوچ کر رہے کسانوں کو روکنے کے لیے مرکزی حکومت اور ہریانہ حکومت کے ذریعہ پانی کی بوچھار و آنسو گیس کے گولے چھوڑنے کی مذمت کی۔ باسکیٹ بال کھلاڑی سجن سنگھ چیما نے منگل کے روز کہا کہ ’’ہم کسانوں کے بچے ہیں اور وہ گزشتہ کئی مہینوں سے پرامن مظاہرہ کر رہے ہیں۔ تشدد کا ایک بھی واقعہ اس دوران نہیں ہوا۔‘‘ انھوں نے مزید کہا کہ ’’جب وہ (کسان) دہلی جا رہے تھے تو ان کے خلاف آنسو گیس کے گولوں کا استعمال ہوا اور پانی کی بوچھاریں کی گئیں۔ اگر ہمارے بڑوں اور بھائیوں کی پگڑی اچھالی گئی، تو ہم اپنے ایوارڈ اور اعزاز کا کیا کریں گے؟ ہم اپنے کسانوں کی حمایت کرتے ہیں۔ ہمیں ایسے ایوارڈ نہیں چاہئیں، اس لیے انھیں لوٹا رہے ہیں۔‘‘

گجن سنگھ چیما کا کہنا ہے کہ کئی سابق کھلاڑی 5 دسمبر کو دہلی پہنچیں گے اور اپنا ایوارڈ لوٹائیں گے۔ پنجاب پولس کے انسپکٹر جنرل عہدہ سے سبکدوش ہوئے گجن سنگھ کا کہنا ہے کہ ’’اگر کسان ایسے قانون نہیں چاہتے ہیں تو مرکزی حکومت ان پر یہ کیوں لاد رہی ہے۔‘‘ انھوں نے واضح لفظوں میں کہا کہ 5 دسمبر کو سابق کھلاڑی دہلی کی سرحد پر ہو رہے کسانوں کے مظاہرے میں بھی شامل ہوں گے جن میں ارجن ایوارڈ یافتہ بلوندر سنگھ سمیت کئی کھلاڑیوں کی شرکت ہوگی۔‘‘