منی پور تشدد: چیف جسٹس ڈی وائی چندرچوڑ کی تنقید کے الزام میں مشہور مصنف بدری شیشادری گرفتار

تمل ناڈو پولیس نے ہفتہ کے روز سیاسی تجزیہ نگار اور مشہور مصنف بدری شیشادری کو ان کی رہائش سے گرفتار کر لیا ہے۔ یہ گرفتاری کدور گاؤں کے سماجی کارکن اور وکیل کویاراسو کی شکایت کی بنیاد پر عمل میں آئی ہے۔ بدری شیشادری کی گرفتاری کے بعد اس کارروائی پر سیاسی حلقوں میں آواز بھی اٹھنے لگی ہے۔

دراصل بدری شیشادری پر منی پور تشدد معاملے کو لے کر سپریم کورٹ اور چیف جسٹس ڈی وائی چندرچوڑ کی تنقید کرنے کا الزام ہے۔ پولیس ذرائع کا کہنا ہے کہ اس معاملے میں پولیس کو شکایت ملی تھی جس کے بعد گرفتاری کی کارروائی ہوئی ہے۔ پولیس کا کہنا ہے کہ ’’بدری شیشادری کو ان کی مائلاپور واقع رہائش سے گرفتار کیا گیا ہے۔ گرفتاری کے بعد انھیں پیرمبلور ضلع پولیس ہیڈکوارٹر لے جایا گیا ہے۔‘‘

پولیس کے ذریعہ دی گئی جانکاری کے مطابق بدری شیشادری کے خلاف تعزیرات ہند کی دفعات 153، 153 اے (مذہب، ذات، مقامِ پیدائش، رہائش، زبان وغیرہ کی بنیاد پر مختلف گروپوں کے درمیان دشمنی کو فروغ دینا) اور دفعہ 505 1(B) کے تحت معاملہ درج کیا گیا ہے۔

اس درمیان تمل ناڈو بی جے پی صدر کے. اناملائی نے بدری شیشادری کی گرفتاری کی شدید الفاظ میں مذمت کی ہے اور ریاستی حکومت پر حملہ کیا ہے۔ انھوں نے اپنے بیان میں کہا کہ ’’ڈی ایم کے حکومت عام لوگوں کو ان کی رائے کے لیے نشانہ بنا رہی ہے۔‘‘