ممتا بنرجی نے 'ترنمول چھاتر پریشد' کے یوم تاسیس کو عصمت دری متاثرہ ٹرینی ڈاکٹر کے نام وقف کیا

مغربی بنگال کی وزیراعلیٰ اور ٹی ایم سی سربراہ ممتا بنرجی نے بدھ کو پارٹی کی طلبا شاخ 'ترنمول چھاتر پریشد' کے یوم تاسیس کو عصمت دری کے بعد قتل کردی جانے والی خاتون ٹرینی ڈاکٹر کے نام وقف کر دیا ہے۔ ممتا بنرجی نے اس واقعہ پر اپنے گہرے صدمے کا اظہار کرتے ہوئے کہا کہ وہ اس شرمناک واقعہ سے بہت غمگین ہیں۔ واضح ہو کہ کولکاتا کے آر جی کر میڈیکل کالج اور اسپتال میں اس مہینے کی شروعات میں ایک خاتون ٹرینی ڈاکٹر کا آبروریزی کے بعد قتل کر دیا گیا تھا جس کے بعد پورے ملک میں احتجاج کا ایک طویل سلسلہ شروع ہوگیا جو اب تک جاری ہے۔

ممتا بنرجی نے بنگالی زبان میں سوشل میڈیا 'ایکس' پر اپنے طویل پوسٹ میں کہا "آج ترنمول چھاتر پریشد کے یوم تاسیس کے موقع پر میں اسے اپنی بہن کو وقف کر رہی ہوں، جس کی کچھ دن پہلے آر جی کر اسپتال میں دردناک موت ہوگئی تھی۔ ہم اپنی قلبی ہمدردی ظاہر کرتے ہیں اور اس واقعہ کے فوری حل کا مطالبہ کرتے ہیں۔ ہماری ہمدردی سبھی عمر کی ان خواتین کے ساتھ ہے جو غیر انسانی واقعات کا شکار ہوئی ہیں۔ ہم بہت غمگین ہیں۔"

ترنمول کانگریس کی سربراہ نے اس بات پر بھی زور دیا کہ طلبا اور نوجوانوں کا سماجی کردار بہت بڑا ہے۔ انہوں نے کہا کہ سماج اور تہذیب کو زندہ رکھتے ہوئے نئے دن کا خواب دکھانا اور نئے دن کے روشن عزائم سے سبھی کو متاثر کرنا طلبا سماج کا کام ہے۔ آج میری ان سبھی سے اپیل ہے کہ اس کوشش میں حوصلہ افزا ہوں اور پابند رہیں۔ میرے پیارے طلبا، اچھے رہیں، صحت مند رہیں اور روشن مستقبل کے لیے پُرعزم رہیں۔