مہاراشٹر حکومت نے معاشی مشیر پینل میں گوتم اڈانی اور مکیش امبانی کے صاحبزادوں کو کیا شامل

مہاراشٹر کی ایکناتھ شندے اور دیویندر فڑنویس حکومت نے ریاست کے معاشی مشیر پینل میں گوتم اڈانی کے بیٹے کرن اڈانی اور مکیش امبانی کے بیٹے اننت امبانی کو شامل کیا ہے۔ حکومت نے کہا ہے کہ اس پینل کے سربراہ ٹاٹا سنس کے چیئرمین این چندرشیکھرن ہوں گے۔

کرن اڈانی دراصل اڈانی پورٹس اینڈ ایس ای زیڈ لمیٹڈ کے چیف ایگزیکٹیو افسر ہیں۔ قابل ذکر بات یہ ہے کہ حال ہی میں ہنڈن برگ ریسرچ کی رپورٹ میں اڈانی گروپ پر شیئروں میں ہیر پھیر اور اکاؤنٹس میں دھوکہ دہی کے الزامات لگائے گئے ہیں۔ حالانکہ اڈانی گروپ نے ان الزامات کی تردید کی ہے، لیکن اس رپورٹ کے سامنے آنے کے بعد اڈانی گروپ کی کمپنیوں کے شیئر زمین دوز ہو چکے ہیں۔ نتیجہ کار گوتم اڈانی دنیا کے ٹاپ 20 امیروں کی فہرست سے بھی باہر ہو چکے ہیں۔

بہرحال، مہاراشٹر حکومت نے کہا ہے کہ کرن اڈانی کو اس 21 رکنی کمیٹی میں پورٹس (بندرگاہوں) اور ایس ای زیڈ سیکٹر کے ماہر کی شکل میں نامزد کیا گیا ہے۔ حکومت کی تجویز میں کہا گیا ہے کہ ’’معاشی اور دیگر متعلقہ ایشوز پر مہاراشٹر حکومت کو مشورہ دینے کے لیے ایک خود مختار باڈی کی شکل میں معاشی مشیر پینل کام کرے گا۔ اس معاشی مشیر پینل میں کپڑا، فارما، پورٹ، ایس ای زیڈ، بینکنگ، زراعت، صنعت، انجینئرنگ اور مینوفیکچرنگ سمیت دیگر سیکٹرس کے ماہر اراکین موجود ہیں۔