مہاراشٹر: بی جے پی رکن اسمبلی کی شادی میں کورونا کے اصولوں کی اڑائی گئیں دھجیاں

ممبئی: مہاراشٹر کے پونا شہر میں گزشتہ دنوں منعقدہ بی جے پی کے رکن اسمبلی کی شادی تقریب میں ایک جانب جہاں کورونا بیماری سے متعلق معاشرتی دوری بنائے رکھنے والی رہنمایانہ ہدایتوں کی دھجیاں اڑائی گئیں، وہیں دوسری جانب تقریب میں مہمانوں کی اکثریت کو بغیر ماسک پہنے بھی دیکھا گیا جس میں ریاست کے بی جے پی کے سربراہ چندرکانت پاٹل اور سابق وزیر اعلی دیویندر فڑنویس بھی شامل ہیں۔

رام ستپوتے ریاست کے شولاپور شہر سے پہلی مرتبہ بی جے پی کی ٹکٹ پر رکن اسمبلی منتخب ہوئے ہیں اتوار کے روز ان کی شادی کا استقبالیہ پونا شہر میں منعقد کیا گیا تھا جس کی ویڈیو سوشل میڈیا پر وائرل ہو رہی ہے اور یہ ویڈیو اس وقت ریاست کے سیاسی گلیاروں میں موضوع بحث بنی ہوئی ہے۔

ویڈیو میں بی جے پی کے قدآور لیڈران چندرکانت پاٹل، دیویندر فڑنویس، پرساد لاڑ اور دیگران کو بغیر ماسک پہنے لوگوں سے انتہائی قریب سے بات چیت کرتے ہوئے دیکھا جا سکتا ہے۔ یہ عمل کورونا وباء کے دوران معاشراتی دوری بنائے رکھنے والے اصولوں کے خلاف ہے۔

مرکزی حکومت و ریاستی حکومتوں نے لاک ڈاون میں نرمی برتنے کے لئے جو رہنمایانہ خطوط مرتب کیے ہیں اس کے مطابق شادی کی تقریب سمیت کسی بھی سماجی تقریب میں صرف پچاس 50 افراد کو ہی شرکت کی اجازت دی گئی ہے جبکہ متذکرہ شادی کی اس تقریب میں بیک وقت ہال میں سینکڑوں افراد موجود تھے۔

مقامی پولیس اسٹیشن کے انسپکٹر جگدالے کے مطابق اس معاملے کی کوئی شکایت درج نہیں ہوئی ہے لیکن شادی تقریب میں مہمانوں کی آمد و رفت کا سلسلہ جاری تھا اس طرح سے وہاں کوئی بھیڑ اکٹھا نہیں ہوئی تھی۔