مدھیہ پردیش: اب پٹواری امتحان میں منتخب طلبا سڑک پر اترے، کانگریس شیوراج حکومت پر لگاتار حملہ آور

مدھیہ پردیش میں ایمپلائی سلیکشن بورڈ کے ذریعہ منعقد پٹواری بھرتی امتحان کے ریزلٹ پر تنازعہ تھمنے کا نام نہیں لے رہا ہے۔ ایک طرف جہاں کئی امتحان دہندگان گھوٹالے کا الزام لگا کر امتحان رد کرنے کا مطالبہ کر رہے ہیں، تو وہیں اب منتخب طلبا بھی سڑک پر اتر آئے ہیں۔ کانگریس کے ریاستی صدر اور سابق وزیر اعلیٰ کمل ناتھ نے اس تعلق سے وزیر اعلیٰ شیوراج سنگھ چوہان پر تلخ حملہ کرتے ہوئے ریاست کو ’گھوٹالہ پردیش‘ بنانے کا الزام لگایا ہے۔

دراصل ریاست میں گزشتہ دنوں ایمپلائی سلیکشن بورڈ کے ذریعہ منعقد پٹواری سمیت دیگر عہدوں کے امتحانات کے نتائج جاری ہوئے۔ اس میں پٹواری بھرتی امتحان میں بڑے پیمانے پر گڑبڑی کا معاملہ سامنے آنے پر تنازعہ کھڑا ہو گیا۔ اب بھی اس تعلق سے انکشافات کا دور جاری ہے اور پوری بھرتی کے عمل پر ہی سوال اٹھ رہا ہے۔ ہزاروں طلبا نے سڑک پر اتر کر بھرتی گھوٹالے کا الزام عائد کرتے ہوئے امتحان رد کرنے کا مطالبہ کیا ہے۔

دوسری طرف ان امتحانات میں منتخب طلبا بھی آج راجدھانی کی سڑکوں پر اتر آئے اور 15 اگست سے پہلے تقرری کا مطالبہ کیا۔ پٹواری امتحان میں منتخب طلبا کا کہنا ہے کہ انھوں نے اپنی اہلیت کی بنیاد پر کامیابی حاصل کی ہے اور اگر کہیں دھاندلی ہوئی ہے تو قصورواروں پر کارروائی کی جائے، نہ کہ منتخب طلبا کے مستقبل سے کھلواڑ کیا جائے۔ اپنی تقرری کا مطالبہ کرتے ہوئے بڑی تعداد میں منتخب طلبا بھوپال پہنچ گئے ہیں۔

اس پورے معاملے میں کانگریس کے ریاستی صدر اور سابق وزیر اعلیٰ کمل ناتھ نے ایک بیان جاری کر کہا ہے کہ پٹواری بھرتی امتحان میں ہوئے گھوٹالے کو لے کر بھوپال میں ہزاروں کی تعداد میں امیدوار پرامن مظاہرہ کر رہے ہیں۔ میں ان کے مظاہرہ کی حمایت کرتا ہوں۔ شیوراج حکومت نے مدھیہ پردیش کو جس طرح سے بھرتی گھوٹالوں کی ریاست بنا دیا ہے، اس میں کسی بھی نوجوان کا مستقبل محفوظ نہیں ہے۔

کمل ناتھ کا کہنا ہے کہ ہر بھرتی گھوٹالے کے تار بالآخر برسراقتدار پارٹی کے لیڈروں سے جڑتے ہیں اور ریاستی حکومت گھوٹالہ کرنے والوں کو بچانے کی کوشش کرتی رہتی ہے۔ بدعنوانی کو تحفظ فراہم کرنے کی شیوراج حکومت کی پالیسی کے سبب نہ صرف نوجوانوں کا مستقبل تاریک ہو رہا ہے بلکہ پوری دنیا میں مدھیہ پردیش کا نام خراب ہو رہا ہے۔ میں نوجوانوں کو بھروسہ دلاتا ہوں کہ 4 ماہ بعد ریاست میں کانگریس پارٹی کی حکومت بنے گی تب گھوٹالے، بدعنوانی اور کمیشن کا راج ختم ہوگا اور آپ کو اہلیت کے مطابق جائز طریقے سے روزگار ملے گا۔