مدھیہ پردیش: فارنسک ٹیم کے فنگرپرنٹ اسپیشلسٹ نے خودکشی کرلی

بڑوانی: مدھیہ پردیش کے ضلع بڑوانی میں فارنسک ٹیم کے فنگرپرنٹ اسپیشلسٹ نے مبینہ طور پر خاندانی اور صحت وجوہات کے سبب خود کشی کر لی۔ بڑوانی کے پولیس افسر دیپک کمار شکلا نے بتایا کہ 36 برس کے فنگرپرنٹ اسپیشلسٹ سب انسپکٹر ویریندر برڈے نے پھانسی لگا کر خود کشی کر لی۔ دیپک کمار شکلا نے بتایا کہ ویریندر برڈے نے کل ڈی آر پی لائن واقع اپنی رہائش گاہ میں کمرہ بند کرکے پھانسی لگا لی تھی۔ ان کی ڈپٹی رینجر بیوی نے پڑوسیوں کی مدد سے انھیں بڑوانی کے نجی اسپتال پہنچایا تھا۔

دیپک کمار شکلا نے بتایا کہ آج صبح پانچ بجے پولیس افسر نے علاج کے دوران دم توڑ دیا۔ ان کی ساڑھے پانچ برس کی ایک بیٹی ہے۔ اس کی لاش کا پوسٹ مارٹم کروا کر اہل خانہ کو سونپ دیا گیا ہے۔ انہوں نے بتایا کہ فی الحال کسی طرح کا سوسائیڈ نوٹ حاصل نہیں ہوا ہے۔ بادی النظر میں خاندانی تنازعہ اور صحت سے متعلق وجوہات سامنے آ رہی ہیں۔ انہوں نے کہا کہ معاملے کی تفتیش شروع کر دی گئی ہے۔