مدھیہ پردیش: کانگریس نے غیر مستقل طبی اہلکاروں کی تحریک کو دی حمایت، فوراً مستقل کرنے کا مطالبہ

مدھیہ پردیش میں ان دنوں محکمہ صحت کے غیر مستقل یعنی کانٹریکٹ پر کام کر رہے ملازمین اپنی ملازمت کو مستقل کرنے کا مطالبہ کرتے ہوئے دھرنا و مظاہرہ کر رہے ہیں۔ اس تحریک کو کانگریس نے بھی اپنی حمایت دے دی ہے۔ غیر مستقل طبی اہلکاروں کا گزشتہ پندرہ دنوں سے ریاست میں احتجاجی مظاہرہ جاری ہے۔ ان ملازمین کا مطالبہ ہے کہ انھیں مستقل کیا جائے اور مستقل ملازمین کی کم از کم تنخواہ کا 90 فیصد دینے کے ساتھ ساتھ دیگر سہولیات بھی دی جائیں۔

راجدھانی بھوپال میں غیر مستقل ملازمین کی تحریک کو حمایت دینے کے لیے کاگنریس کا نمائندہ وفد پہنچا جس میں سابق مرکزی وزیر ارون یادو، سابق وزیر پی سی شرما کے علاوہ کئی سرکردہ کانگریس لیڈران بھی شامل تھے۔ اس موقع پر ارون یادو نے کہا کہ کانٹریکٹ پر کام کر رہے طبی اہلکاروں نے کورونا بحران میں اپنی جان کو ہتھیلی پر رکھ کر مریضوں کی خدمت کرنے میں کوئی کسر نہیں چھوڑی۔ یہی وجہ تھی کہ حکومت نے پہلے ان پر پھول برسائے، لیکن بعد میں یہی شیوراج حکومت لاٹھی برسانے میں لگ گئی۔

ارون یادو کا کہنا ہے کہ کانگریس ان ملازمین کے مستقل کرنے کی حمایت کرتی ہے۔ راجستھان میں کانگریس کی حکومت ہے اور وہاں غیر مستقل ملازمین کو مستقل کیا گیا ہے۔ اسی طرح 2023 کے اسمبلی انتخاب کے بعد مدھیہ پردیش میں کانگریس کی حکومت آئے گی تو وہ ان کانٹریکٹ والے ملازمین کی ملازمت کو مستقل کرے گی۔

واضح رہے کہ گزشتہ دنوں ریاست کے وزیر صحت پربھورام چودھری کی مخالفت میں نعرے بازی کرنے والے 10 مظاہرین کو پولیس نے گرفتار کر جیل بھیج دیا تھا۔ اس کے بعد سے غیر مستقل ملازمین حکومت کے خلاف ناراضگی کا اظہار کر رہے ہیں اور ان کی تحریک مزید تیز ہوتی جا رہی ہے۔ دوسری طرف حکومت ان ملازمین کے مطالبات اور تحریک سے پوری طرح آنکھیں پھیر کر بیٹھی ہے۔