لوک سبھا اسپیکر پر ’قومی ترانہ‘ کی توہین کا الزام عائد، سپریا شرینیت نے جاری کی ویڈیو
اس ویڈیو کو شیئر کرتے ہوئے کانگریس کی ترجمان نے لکھا ہے کہ ’’محترم اسپیکر، قومی ترانے کے وقت جہاں ہیں، وہیں کھڑے ہو جانا چاہئے۔ جو آپ نے کیا وہ قومی ترانے کی شدید توہین ہے۔‘‘
![<div class="paragraphs"><p>سپریا شرینیت / ویڈیو گریب</p></div>](https://media.assettype.com/qaumiawaz%2F2024-05%2Fa0e1b32b-09ba-4523-b673-9f1c2c69761b%2FScreenshot_2024_05_21_185203.png?rect=0%2C0%2C1858%2C1045&auto=format%2Ccompress&fmt=webp)
سپریا شرینیت / ویڈیو گریب
کانگریس کی ترجمان سپریا شرینیت نے لوک سبھا اسپیکر اوم برلا پر قومی ترانے کی توہین کا الزام عائد کیا ہے۔ انہوں نے ایک ویڈیو شیئر کی ہے جس میں لوک سبھا اسپیکر قومی ترانے کے دوران چلتے ہوئے نظر آتے ہیں۔ یہ ویڈیو شیئر کرتے ہوئے کانگریس کی ترجمان نے اسپیکر سے کہا ہے کہ قومی ترانے کے وقت جہاں رہتے ہیں وہیں کھڑے ہو جایا جاتا ہے۔ آپ نے قومی ترانے کی شدید توہین کی ہے۔
کانگریس کی قومی ترجمان نے اپنے سوشل میڈیا پلیٹ فارم ’ایکس‘ پر جو ویڈیو شیئر کی ہے اس میں دیکھا جا سکتا ہے کہ صدر جمہوریہ دروپدی مرمو کھڑی ہیں، قومی ترانے کی دھن بج رہی ہے اور اسی دوران عقب کے دروازے سے لوک سبھا اسپیکر نمودار ہوتے ہیں اور صدر جمہوریہ کے بغل میں جا کر کھڑے ہو جاتے ہیں۔ 22 سیکنڈ کی اس ویڈیو کو شیئر کرتے ہوئے کانگریس کی ترجمان نے لکھا ہے کہ ’’محترم اسپیکر، قومی ترانے کے وقت جہاں ہیں، وہیں کھڑے ہو جانا چاہئے۔ جو آپ نے کیا وہ قومی ترانے کی شدید توہین ہے۔‘‘
واضح رہے کہ اس سے قبل اپوزیشن لیڈر راہل گاندھی نے اسپیکر اوم برلا کے ذریعے پارلیمنٹ میں ایمرجنسی پر مذمتی قرارداد پیش کرنے پر سخت ناراضگی کا اظہار کیا تھا۔ راہل گاندھی نے اپوزیشن کے لیڈران کے ساتھ اسپیکر سے ملاقات کی تھی اور کہا تھا کہ اسپیکر کو اس طرح کے سیاسی قراردادوں سے گریز کرنا چاہئے۔ ابھی راہل گاندھی کی اظہار ناراضگی کی خبر میڈیا میں آئی ہی تھی کہ کانگریس کی ترجمان نے قومی ترانے کے دوران اسپیکر کے چلنے کی ویڈیو شیئر کر دی ہے۔
Follow us: Facebook, Twitter, Google News
قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔