لوک سبھا انتخاب، چوتھا مرحلہ: مغربی بنگال میں ووٹنگ فیصد سب سے زیادہ، جموں و کشمیر سب سے پیچھے

لوک سبھا انتخاب کا چوتھا مرحلہ اختتام پذیر ہو گیا ہے۔ 10 ریاستوں اور مرکز کے زیر انتظام خطوں کی 96 لوک سبھا سیٹوں پر کھڑے سبھی امیدواروں کی قسمت کا فیصلہ ای وی ایم میں قید ہو چکا ہے۔ اس مرحلہ میں 8 بجے تک حاصل رپورٹ کی بنیاد پر الیکشن کمیشن نے جو ووٹنگ فیصد جاری کیا ہے، وہ 62.84 ہے۔ سب سے زیادہ مغربی بنگال میں 76.02 فیصد اور سب سے کم جموں و کشمیر میں 36.88 فیصد ووٹنگ ہوئی ہے۔

چوتھے مرحلہ میں 8.73 کروڑ خواتین سمیت 17.70 کروڑ سے زیادہ ووٹرس حق رائے دہی کے لیے اہل تھے۔ ووٹنگ کے لیے 1.92 لاکھ پولنگ مراکز پر 19 لاکھ سے زیادہ الیکٹورل افسران کو تعینات کیا گیا تھا۔ کچھ مقامات سے تشدد کی خبریں ضرور آئیں، لیکن بیشتر مقامات پر امن و امان کے ساتھ پولنگ کا عمل انجام پا گیا۔

اس مرحلہ مین تلنگانہ کی سبھی 17 لوک سبھا سیٹوں پر اور آندھرا پردیش کی سبھی 25 لوک سبھا سیٹوں پر ووٹ ڈالے گئے۔ علاوہ ازیں اتر پردیش کی 13 لوک سبھا سیٹوں، بہار کی 5 لوک سبھا سیٹوں، جھارکھنڈ کی 4 لوک سبھا سیٹوں، مدھیہ پردیش کی 8 لوک سبھا سیٹوں، مہاراشٹر کی 11 لوک سبھا سیٹوں، اڈیشہ کی 4 لوک سبھا سیٹوں، مغربی بنگال کی 8 لوک سبھا سیٹوں اور جموں و کشمیر کی ایک لوک سبھا سیٹ پر ووٹ ڈالے گئے۔ اس کے ساتھ ہی آندھرا پردیش کی 172 اسمبلی سیٹوں اور اڈیشہ کی 28 اسمبلی سیٹوں پر بھی ووٹنگ ہوئی۔

آئیے جانتے ہیں کس ریاست میں کتنے فیصد ووٹنگ ہوئی:

• مغربی بنگال 76.02 فیصد

• مدھیہ پردیش 69.02 فیصد

• آندھرا پردیش 68.20 فیصد

• اڈیشہ 64.23 فیصد

• جھارکھنڈ 63.88 فیصد

• تلنگانہ 61.56 فیصد

• اتر پردیش 58.00 فیصد

• بہار 55.92 فیصد

• مہاراشٹر 52.93 فیصد

• جموں و کشمیر 36.88 فیصد