کسان تحریک کو ’چپکو آندولن‘ کے لیڈر سندر لال بہوگنا کی بھی ملی حمایت

’چپکو آندولن‘ کے لیڈر سندر لال بہوگنا نے مودی حکومت کے متنازعہ زرعی قوانین کے خلاف مظاہرہ کر رہے کسانوں کو اپنی حمایت دینے کا اعلان کر دیا ہے۔ جمعہ کے روز سندر لال بہوگنا نے کہا کہ وہ ’اَن داتا‘ کے مطالبات کی حمایت کرتے ہیں۔

سندرلال بہوگنا مشہور گڑھوالی ماہر ماحولیات اور چپکو آندولن کے لیڈر ہیں۔ گزشتہ کئی سالوں سے وہ ہمالیہ میں جنگلوں کے تحفظ کے لیے جدوجہد کر رہے ہیں۔ وہ 1970 کی دہائی میں ہوئے ’چپکو آندولن‘ کے اہم اراکین میں سے ایک ہیں۔ بعد میں انھوں نے 1980 کی دہائی سے شروع ہو کر 2004 کے شروع تک ’اینٹی ٹہری ڈیم تحریک‘ کی قیادت بھی کی۔

واضح رہے کہ مرکز کی مودی حکومت کے ذریعہ نافذ تین نئے زرعی قوانین کے خلاف 26 نومبر سے ہزاروں کسان قومی راجدھانی دہلی کی مختلف سرحدوں پر احتجاجی مظاہرہ کر رہے ہیں۔ کسانوں کا مطالبہ ہے کہ حکومت ان قوانین کو واپس لے اور ایم ایس پی پر قانون لائے۔ دوسری طرف حکومت کئی دور کی بات چیت کے بعد بھی پیچھے ہٹنے کو تیار نہیں ہے اور الٹا تحریک پر لگاتار حملہ آور ہے۔