کیجریوال فائدہ کے لیے اپنی ’آتما‘ بھی فروخت کر سکتے ہیں: کیپٹن امرندر

چندی گڑھ: وزیر اعلی پنجاب کیپٹن امرندر سنگھ نے آج الزام عائد کیا کہ فائدہ ہوگا تو دہلی کے وزیر اعلی اروند کیجریوال اپنی آتما (روح) بھی بیچ سکتے ہیں۔ کسانوں کی تحریک کے درمیان دونوں وزرائے اعلیٰ کے مابین جاری ’لفظی جنگ‘ میں اروند کیجریوال نے کیپٹن امرندر سنگھ پر اپنے بیٹے کے خلاف انفورسمنٹ ڈائریکٹوریٹ (ای ڈی) معاملے میں مرکز کے ساتھ سودے بازی کر کے کسانوں کی تحریک کو بیچنے کا الزام لگایا۔ اس کے جواب میں پنجاب کے وزیر اعلیٰ نے جاری ایک بیان میں کہا کہ ’’عام آدمی پارٹی کے رہنما ’بزدل‘ ہیں اور انہوں نے شرومنی اکالی دل لیڈر بکرم سنگھ مجیٹھیا کی بدنامی کے خوف سے معذرت کی ہے۔‘‘

کیپٹن امرندر نے زور دے کر کہا کہ اروند کیجریوال کسانوں کے مفادات کو بچانے میں اپنی ناکامی کو چھپانے کے لئے مایوس کن کوششیں کر رہے ہیں لیکن ان کوششوں سے وہ کسانوں کے غم و غصے سے نہیں بچ پائیں گے اور آئندہ پنجاب اسمبلی انتخابات میں اپنی پارٹی کے نام ونشان کو مٹنے سے نہیں بچا پائیں گے۔ انہوں نے مزید کہا کہ ’’سب جانتے ہیں کہ میں ای ڈی یا کسی کے بھی غلط معاملات میں دبنے والا نہیں ہوں اور لوگ یہ بھی جانتے ہیں کہ اگر آپ کو فائدہ ہوا تو آپ اپنی روح بھی بیچ دیں گے۔‘‘

پنجاب کے وزیر اعلیٰ نے دہلی کے وزیر اعلیٰ کو چیلنج بھی کیا کہ وہ ایک مثال پیش کریں جب وہ (کیپٹن) کبھی ای ڈی یا کسی بھی ایجنسی کے دباؤ سے کبھی پیچھے ہٹے ہیں۔ انہوں نے کہا کہ انہوں نے ہمیشہ آپریشن بلیو اسٹار یا ستلج یمنا کنال سے لے کر زرعی قوانین کے مسئلے تک اپنے عوام کے مفادات میں کام کیا ہے۔