کشمیر ٹریڈ الائنس نے کیا باہر کی گاڑیوں کا دوبارہ رجسٹریشن کرانے کے خلاف سری نگر میں احتجاج

سری نگر: کشمیر ٹریڈ الائنس (کے ٹی اے) نے بدھ کے روز یہاں پریس کالونی میں سرکار کے باہر کی گاڑیوں کی از سر نو رجسٹریشن کرانے کے حکمنامے کے خلاف احتجاج درج کرایا۔ الائنس نے ریجنل ٹرانسپورٹ افسر کے اس حکمنامے کو نا انصافی سے تعبیر کرتے ہوئے اس کی فوری واپسی کا مطالبہ کیا۔ الائنس کے ایک عہدیدار اعجاز احمد نے بتایا کہ یہ حکمنامہ گاڑیوں کے ڈیلروں اور مالکوں کے ساتھ نا انصافی ہے۔ انہوں نے کہا کہ ان کو اب 9 فیصد کے حساب سے دوبارہ ٹیکس ادا کرنا پڑے گا۔

ان کا کہنا تھا کہ ’جب کوئی شخص گاڑی خریدتا ہے تو وہ اس کا ہمیشہ کے لئے 9 فیصد ٹیکس ادا کرتا ہے پھر اگر وہ آٹھ برس کے بعد وہ گاڑی کسی دوسرے شخص کو فروخت کرتا ہے تو جب اس گاڑی کو کشمیر لایا جاتا ہے تو اے آر ٹی او کشمیر کے مطابق یہاں اس گاڑی کا دوبارہ رجسٹریشن کرانا ہے اور اس گاڑی کا دوبارہ ٹیکس ادا کرنا ہے‘۔

موصوف نے کہا کہ ایک ہی گاڑی کے لئے اس کے مالکان دو بار ٹیکس کیسے ادا کر سکتے ہیں۔ انہوں نے کہا کہ ہمارا مطالبہ ہے کہ اس حکمنامے کو واپس کیا جائے۔ قابل ذکر ہے کہ اے آر ٹی او کشمیر نے ایک حکمنامہ جاری کیا ہے جس میں باہر کی گاڑیوں کو 15 دنوں کے اندر اندر رجسٹریشن کرانے کی ہدایات دی گئی ہیں۔