کشمیر: بالائی علاقوں میں تازہ برف باری، 15 مارچ تک موسم خراب رہنے کی پیش گوئی

سری نگر: وادی کشمیر کے بالائی علاقوں بشمول شہرہ آفاق سیاحتی مقام گلمرگ میں تازہ برف باری جبکہ میدانی علاقوں میں موسلا دھار بارشیں ہوئیں جس سے درجہ حرارت میں ایک بار پھر کمی واقع ہونے سے سردی میں قدرے اضافہ درج ہوا ہے۔ادھر محکمہ موسمیات کے ایک ترجمان کے مطابق وادی کشمیر میں 15 مارچ تک موسم خراب رہنے کا امکان ہے۔

انہوں نے بتایا کہ وادی میں 15 مارچ تک میدانی علاقوں میں بارشیں جبکہ بالائی علاقوں میں ہلکے درجے کی برف باری متوقع ہے تاہم 11 سے 13 مارچ تک موسم زیادہ خراب رہ سکتا ہے۔ ان کا مزید کہنا تھا کہ خراب موسمی حالات کے باعث کشمیر شاہراہ پر ٹریفک کی نقل و حمل متاثر ہوسکتی ہے۔ خراب موسمی حالات کے پیش نظر باغ مالکان سے کہا گیا ہے کہ وہ 15 مارچ تک اپنے باغوں کی دوا پاشی کرنے سے احتراز کریں۔ وادی کشمیر میں منگل کی شام سے ہی برف وباراں کا سلسلہ رک رک کر جاری ہے۔

متعلقہ محکمے کے مطابق سیاحتی مقام گلمرگ میں گزشتہ چوبیس گھنٹوں کے دوران 2.5 سینٹی میٹر تازہ برف جمع ہوئی ہے جبکہ گرمائی دارلحکومت سری نگر میں گزشتہ چوبیس گھنٹوں کے دوران 1.1 ملی میٹر بارش ریلکارڈ ہوئی ہے۔ خراب موسمی حالات کے باعث درجہ حرارت میں بھی گراوٹ درج ہوئی ہے جس سے سردی میں قدرے اضافہ درج ہوا ہے اور لوگوں نے سری سے بچنے کے لئے جہاں گرم لباس ایک بار پھر زیب تن کرنا شروع کر یئے ہیں وہیں دفاتر، کام کی جگہوں اور دکانوں میں بھی گرمی کے آلات کا استعمال کیا جا رہا ہے۔ ادھر بارشوں کی باعث شہر و گام کی سڑکیں جھیل جھرنوں کا نظارہ پیش کر رہی ہیں۔

لوگوں کا کہنا ہے کہ سڑکوں پر بنے گڑھوں میں پانی جمع ہوا ہے جن پر گاڑیوں کے چلنے سے اٹھنے والی چھینٹیں دور دور تک پیدل چلنے والے مسافروں کو اپنی لپیٹ میں لے کر کہیں کا نہیں چھوڑتی ہیں۔ انہوں نے کہا کہ عمر رسیدہ افراد، بچوں اور خواتین کا سڑکوں پر چلنا پھرنا خطرے سے خالی نہیں ہے۔

محکمہ موسمیات کے مطابق گرمائی دارلحکومت سری نگر میں کم سے کم درجہ حرارت منفی 3.5 ڈگری سینٹی گریڈ ریکارڈ کیا گیا۔ قابل ذکر ہے کہ سری نگر میں جہاں ماہ جنوری میں سردیوں کا پچیس سالہ ریکارڈ ٹوٹ گیا، جب 31 جنوری کو کم سے کم درجہ حرارت منفی 8.8 ڈگری سینٹی گریڈ ریکارڈ ہوا تھا، وہیں ماہ فروری میں گرمیوں کا 57 سالہ ریکارڈ پاش پاش ہوگیا جب فروری کی ایک شب کم سے کم درجہ حرارت 8.0 ڈگری سینٹی گریڈ ریکارڈ ہوا تھا۔

وادی کے مشہور زمانہ سیاحتی مقام گلمرگ میں کم سے کم درجہ حرارت منفی 3.5 ڈگری سینٹی گریڈ جبکہ دوسرے مشہور سیاحتی مقام پہلگام میں کم سے کم درجہ حرارت 0.4 ڈگری سینٹی گریڈ ریکارڈ ہوا ہے۔ سرحدی ضلع کپوارہ میں کم سے کم درجہ حرارت 3.3 ڈگری سینٹی گریڈ جبکہ قاضی گنڈ میں کم سے کم درجہ حرارت 4.6 ڈگری سینٹی گریڈ اور ککر ناگ میں کم سے کم درجہ حرارت 2.7 ڈگری سینٹی گریڈ ریکارڈ ہوا ہے۔