تیرتھ سنگھ راوت ہوں گے اتراکھنڈ کے نئے وزیر اعلیٰ، شام 4 بجے حلف برداری

دہرادون: وزیر اعلیٰ ترویندر سنگھ راوت کے استعفیٰ کے بعد اتراکھنڈ میں جاری سیاسی ہلچل اب انجام کو پہنچ رہا ہے۔ ریاستی بی جے پی قانون ساز پارٹی کے ایک اجلاس کے دوران بدھ کے روز نئے وزیر اعلیٰ کے نام پر مہر ثبت ہو گئی ہے۔ میڈیا رپورٹوں کے مطابق تیرتھ سنگھ راوت اتراکھنڈ کے نئے وزیر اعلیٰ ہوں گے۔ میڈیا رپورٹ کے مطابق تیرتھ سنگھ آج شام 4 بجے حلف اٹھائیں گے۔

ترویندر سنگھ راوت گزشتہ دنوں دہلی میں بی جے پی کی اعلیٰ کمان سے ملاقات کے لیے پہنچے تھے، جس کے بعد سے ہی ان کے استعفی کی چہ میگوئیاں شروع ہو گئی تھیں۔ گزشتہ شام آخر کار ترویندر سنگھ نے اپنا استعفی ریاستی گونر کو سونپ دیا تھا۔ وزیر اعلیٰ کی ریس میں کامیاب ہونے والے تیرتھ سنگھ راوت پوڑی گڑھوال سے رکن پارلیمنٹ ہیں اور ماضی میں پارٹی کے ریاستی صدر رہ چکے ہیں۔

عہدے کے لیے منتخب کیے جانے کے بعد تیرتھ سنگھ نے کہا، ’’میں سنگھ کا پرچارک رہا ہوں۔ سنگھ سے جڑا، ودیارتھی پریشد سے جڑا، جنرل سکرٹری بنا۔ جو بھی ذمہ داری مجھے دی گئی، اسے میں نے نبھایا اور آگے بھی نبھانے کی پوری کوشش کروں گا۔ ہم ٹیم کے جذبہ کے ساتھ آگے بڑھیں گے۔‘‘

انہوں نے کہا، ’’مرکزی قیادت وزیر اعظم، امت شاہ اور قومی صدر کا میں شکریہ ادا کرتا ہوں۔ میں نے کبھی سوچا بھی نہیں تھا اور تصور بھی نہیں کیا تھا کہ مجھے یہ عہدہ حاصل ہوگا۔‘‘ اس سے قبل تیرتھ سنگھ نے ترویندر سنگھ کی بھی تعریف کی اور کہا کہ ترویندر جی نے جو کام کیے وہ کبھی نہیں ہویے تھے۔