کشمیر: افضل گورو کی آٹھویں برسی پر کہیں مکمل تو کہیں جزوی ہڑتال

سری نگر: وادی کشمیر میں منگل کے روز محمد افضل گورو کی آٹھویں برسی کے موقع پر کہیں مکمل تو کہیں جزوی ہڑتال رہی جس سے معمولات زندگی متاثر ہو کر رہ گئے۔ بتادیں کہ محمد افضل گورو کو سنہ 2001ء کے پارلیمنٹ حملہ کیس میں مجرم قرار دے کر 9 فروری 2013ء کو دلی کی تہاڑ جیل میں پھانسی دی گئی تھی اور پھانسی کے بعد ان کے جسد خاکی کو جیل کے احاطے میں ہی سپرد خاک کیا گیا تھا۔

موصولہ اطلاعات کے مطابق جہاں سری نگر کے پائین و بالائی علاقوں کے بازاروں میں ہڑتال کی وجہ سے دن بھر الو بولتے رہے اور سڑکوں پر ٹرانسپورٹ کی جزوی نقل و حمل جاری رہی، وہیں شمالی کشمیر کے قصبہ سوپور اور جنوبی کشمیر کے ضلع اننت ناگ میں بھی جزوی ہڑتال سے معمولات زندگی متاثر ہو کر رہ گئے۔

سینئر و بزرگ حریت لیڈر سید علی گیلانی کے مبینہ ٹوئٹر ہینڈل پر ہڑتال کی کال دی گئی تھی اور لوگوں سے کہا گیا تھا کہ وہ 9 فروری اور 11 فروری کو مکمل ہڑتال کریں۔ واضح رہے کہ 11 فروری 1984 کو کالعدم تنظیم لبریشن فرنٹ کے بانی محمد مقبول بٹ کو تہاڑ جیل میں ہی پھانسی دی گئی تھی اور وہیں دفن بھی کیا گیا تھا۔

وادی میں علیحدگی پسند تنظیمیں محمد افضل گورو اور محمد مقبول بٹ کی باقیات کی واپسی کا مطالبہ کر رہی ہیں۔ سری نگر کے عیدگاہ علاقہ میں واقع تاریخی مزار شہداء میں دو قبریں افضل گورو اور مقبول بٹ کی باقیات کے لئے خالی رکھی گئی ہیں۔ یو این آئی اردو کے ایک نمائندے نے منگل کو سری نگر کے مختلف علاقوں کا دورہ کر کے بتایا کہ گرمائی دارلحکومت کے پائین و بالائی علاقوں کے بازار بند ہیں اور سڑکوں پر گاڑیوں کی جزوی نقل و حمل جاری ہے۔

انہوں نے کہا کہ شہر کے حساس علاقوں میں سیکورٹی فورسز کی اضافی نفری کو تعینات کیا گیا تھا اور سیول لائنز کے تجارتی مرکز لالچوک میں کئی مقامات پر سیکورٹی فورسز اہلکاروں نے ناکے لگائے تھے جہاں وہ نجی گاڑیوں کی تلاشی کر رہے تھے۔ سری نگر کے نوہٹہ علاقے میں واقع تاریخی جامع مسجد کے دونوں دروازے مقفل رہے اور جامع مارکیٹ میں بھی سناٹا ہی چھایا رہا۔

جامع مسجد حریت کانفرنس کے چیئرمین میر واعظ مولوی عمر فاروق کا گڑھ مانا جاتا ہے۔ شہر خاص کے نالہ مار، زینہ کدل، نواح کدل اور دیگر علاقوں میں بھی ہڑتال کی وجہ سے بازاروں میں الو بولتے رہے اور سڑکوں پر اکا دکا گاڑیوں کو ہی چلتے ہوئے دیکھا گیا۔

موصولہ اطلاعات کے مطابق شمالی کشمیر کے قصبہ سوپور جو افضل گورو کا آبائی علاقہ ہے، میں بھی جزوی ہڑتال رہی۔ دکانوں کو بند دیکھا گیا جبکہ سڑکوں پر ٹرانسپورٹ کی نقل وحمل جزوی طور ہی جاری دیکھی گئی۔ جنوبی کشمیر کے ضلع اننت ناگ میں بھی جزوی ہڑتال کی اطلاعات ہیں جبکہ وادی کے بعض حصوں میں معمولی نوعیت کے ہڑتال کی اطلاعات موصول ہوئی ہیں۔