کرگل وجے دیوس: دراس میں کرگل وار میموریل پر تقریب کا اہتمام

سری نگر: کرگل وجے دیوس کی 22 ویں سالگرہ کے موقع پر پیر کے روز دراس (کرگل) میں واقع کرگل وار میموریل پر ایک تقریب منعقد ہوئی جس میں کرگل جنگ کے دوران اپنی جانوں کا نذرانہ پیش کرنے والے فوجی جوانوں کو شاندار خراج عقیدت پیش کیا گیا۔

اس موقع پر لداخ یونین ٹریٹری کے لیفٹیننٹ گورنر آر کے ماتھر مہمان خصوصی تھے جنہوں نے وار میموریل پر پھول مالا چڑھائی۔ بتا دیں کہ اس تقریب میں صدر جمہوریہ رام ناتھ کووند کو شرکت کرنا تھی لیکن ناساز موسمی حالات کی وجہ سے ایسا ممکن نہیں ہو سکا۔ موصوف صدر نے بعد میں شمالی کشمیر کے بارہمولہ میں واقع دیگر وار میموریل پر پھول مالا چڑھائی اور کرگل جنگ کے دوران ملک کے دفاع کے لئے اپنی جانیں قربان کرنے والے فوجی جوانوں کو خراج عقیدت پیش کیا۔

سری نگر میں مقیم دفاعی ترجمان عمران موسوی نے اپنے ایک بیان میں کہا کہ کرگل وجے دیوس کی 22 ویں سالگرہ کے موقع پر پیر کے روز دراس میں واقع کرگل وار میموریل پر ایک تقریب منعقد ہوئی جس میں لیفٹیننٹ گورنر آر کے ماتھر نے مہمان خصوصی کی حیثیت سے شرکت کی اور وار میموریل پر پھول مالا چڑھائی۔

انہوں نے بیان میں کہا کہ تقریب میں کرگل جنگ کے دوران اپنی جانوں کا نذرانہ پیش کرنے والے بہادر فوجی جوانوں کو شاندار خراج عقیدت پیش کیا گیا۔ بیان میں کہا گیا کہ 'اس سال کی کرگل وجے دیوس کی تقریبات دو طریقوں سے منفرد تھیں کیونکہ اس سال عین اسی موقع پر 'سوارنم وجے ورش فتح مشعل' کرگل وار میموریل پر پہنچ گئی۔ یہ 'فتح مشعل' سال 1971 ہند – پاک جنگ کے دوران ملک کی پچاس سالہ فتح کی یاد گار ہے'۔ موصوف ترجمان نے بیان میں کہا کہ 26 جولائی کو کرگل وار میموریل پر منعقدہ تقریب کا آغاز چیف آف ڈیفنس اسٹاف جنرل بپن راوت کی طرف سے 'سوارن وجے ورش فتح مشعل' کے استقبال سے ہوا۔

انہوں نے کہا کہ اس موقع پر شمالی کمان کے جی او سی ان سی لیفٹیننٹ جنرل وائی کے جوشی، چودہویں کور کے جی او سی جنرل پی جی کے مینن، پندرہویں کور کے جی او سی لیفٹیننٹ جنرل ڈی پی پانڈے اور سولہویں کور کے جی او سی لیفٹیننٹ جنرل ایم وی سوچندرا کمار اور دیگر فوجی و سول افسران، قربانی پیش کرنے والے فوجی جوانوں کے قریبی رشتہ دار بھی موجود تھے۔

بیان میں کہا گہا کہ اس کے بعد وار میموریل پر فوجی وسول افسروں نے پھول مالائیں چڑھائیں اور قربانی پیش کرنے والے فوجی جوانوں کے اہل خانہ نے بھی اشک بار آنکھوں سے انہیں خراج پیش کیا۔ قابل ذکر ہے کہ ملک بھر میں 26 جولائی کو سال 1999 میں کرگل جنگ کے دوران اپنی جانیں نچھاور کرنے والے جوانوں کو یاد کیا جاتا ہے۔