کرگل: کورونا وائرس کے سبب محرم کے جلوس قصبوں میں داخل نہیں ہو پائیں گے

سری نگر: ضلع انتظامیہ کرگل نے کورونا گائیڈ لائنز پر عمل درآمد کو یقینی بنانے کے لئے 9 اور 10 محرم کو ملحقہ بستیوں کے محرم جلوس قصبہ میں داخل ہونے پر پابندی عائد کر دی ہے۔ حکام نے مذہبی تنظیموں سے قصبہ میں جلوس عزا میں شرکا کی محدود تعداد کو بھی یقین بنانے کی تلقین کی ہے۔

ضلع مجسٹریٹ کرگل سنتوش سکھ دیو کی طرف سے بدھ کو جاری ایک حکمنامے میں کہا گیا ہے کہ ’’نو اور دس محرم کو ملحقہ بستیوں سے کسی بھی جلوس کو قصبے میں داخل ہونے کی اجازت نہیں ہوگی۔ مذہبی تنظیمیں، انجمن جمیعت علما اثنا عشریہ اور امام خمینی میموریل ٹرسٹ کے زیر اہتمام برآمد ہونے والے جلوسوں، جن میں شرکا کی زیادہ سے زیادہ تعداد تین سو ہونی چاہئے، کی پُرامن نقل و حمل کو یقینی بنائیں گے۔‘‘ حکمنامے میں مزید کہا گیا ہے کہ اس کے علاوہ تمام تر کورونا گائیڈ لائنز نافذ العمل رہیں گی۔