جموں و کشمیر: جماعت اسلامی کے اسکولوں میں تعلیمی سرگرمیاں بند کرنے کا حکم

حکومت جموں و کشمیر نے منگل کو ایک اہم قدم اٹھاتے ہوئے مقامی جماعت اسلامی سے منسلک ’فلاح عام‘ ٹرسٹ کے ذریعہ چلنے والے سبھی اسکولوں میں تعلیمی سرگرمیوں کو بند کرنے کا حکم صادر کر دیا ہے۔ اسکولی تعلیم محکمہ کے چیف سکریٹری بی کے سنگھ نے کہا کہ فلاح عام ٹرسٹ کے ذریعہ چلنے والے جموں و کشمیر کے اسکولوں میں اب سبھی تعلیمی سرگرمیاں فوراً بند ہو جائیں گی۔

واضح رہے کہ مقامی جماعت اسلامی تنظیم کو جموں و کشمیر حکومت نے پہلے ہی ممنوع قرار دے دیا ہے۔ منگل کو جاری حکم میں یہ واضح طور پر کہا گیا کہ ’’ان ممنوعہ تنظیموں کی طرف سے چل رہے اداروں میں پڑھنے والے سبھی طلبا موجودہ تعلیمی سیشن یعنی 22-2021 کے لیے قریب کے سرکاری اسکولوں میں داخلہ لیں۔ سبھی سی ای او/پرنسپل/زیڈ ای او ان طلبا کے داخلے میں سہولت فراہم کریں گے۔‘‘

انتظامیہ کے ذرائع نے بتایا کہ بارہویں درجہ تک کے تقریباً ایک درجن اسکول فلاح عام ٹرسٹ کے ذریعہ چلائے جا رہے ہیں۔ اس کے علاوہ پرائمری اور مڈل سطح کے درجنوں دیگر اسکول ہیں جو اس حکم سے متاثر ہوں گے۔