جونپور: نوجوان نے پانچ افراد کو گولی ماری، ایک ہلاک، دو کی حالت نازک

جونپور: اتر پردیش کے جونپور ضلع میں پیر کی رات دیر گئے ایک نوجوان نے پانچ لوگوں کو گولی مار دی، جس میں ایک کی موت ہوگئی، جب کہ دو کی حالت نازک بتائی جاتی ہے۔ پولیس کے مطابق ضلع کے نیودھیا تھانہ علاقہ کے رام نگر میں کل رات تقریباً 12 بجے فائرنگ کے اس واقعہ میں تمام زخمیوں کو جونپور ضلع اسپتال ریفر کیا گیا ہے۔ قریبی تھانوں کی فورسز کو موقع پر تعینات کر دیا گیا ہے۔ معلوم ہوا ہے کہ واقعہ پرانی دشمنی کا ہے۔

پولیس کے مطابق ضلع کے نیودھیا تھانہ علاقہ کے رام نگر کے رہنے والے رویندر یادو کا خاندان دو دن پہلے ممبئی سے آیا تھا۔ ان کی بیٹی خوشبو کے مطابق رات 12 بجے کے قریب گھر والے کھانا کھانے کے بعد اپنے اپنے کمروں میں تھے کہ محلے کا آکاش عرف راجو پستول لے کر وہاں پہنچا۔

الزام ہے کہ آکاش عرف راجو نے خوشبو کے دادا راج بالی (70) پر گولی چلائی، جس کی وجہ سے ان کی موت ہوگئی، رویندر یادو (55)، اس کی ماں شانتی دیوی، بیوی ویملا دیوی (45) اور بیٹا گورو (13) نیچے آگئے۔ آکاش نے انہیں بھی گولی مار دی۔ واقعہ کی اطلاع ملتے ہی پولیس موقع پر پہنچ گئی۔

اس دوران مڈییاہوں کے ڈپٹی سپرنٹنڈنٹ آف پولیس (سی او) سنت کمار اپادھیائے بھی موقع پر پہنچ گئے۔ ایڈیشنل سپرنٹنڈنٹ آف پولیس (اے ایس پی) دیہی شیلیندر کمار سنگھ نے بتایا کہ گولی لگنے سے ایک شخص کی موت ہوئی ہے، جب کہ دو کی حالت نازک ہے۔ معاملہ زیر تفتیش ہے۔