سخت سیکورٹی کے درمیان دہلی کی جامع مسجد سے لیکر پورے ہندوستان میں ہوئی عید کی نماز ادا

ملک بھر میں آج عید الفطر منائی جارہی ہے۔پرانی دہلی کے لوگوں نے بڑی تعداد میں صبح چھہ بجے قومی راجدھانی دہلی کی جامع مسجد میں نماز ادا کی اور اللہ سے امن اور خوشحالی کی دعا کی۔ دہلی کے مختلف علاقوں میں نماز عید ہوئی اور لوگوں نے بڑی تعداد میں اس میں شرکت کی ۔

بڑوں اور بچوں نے جہاں نئے نئے کپڑے پہنے ہوئے تھے وہیں گھر کی خواتین نے مہمانوں کے لئےشیر خورما بنایا تھا۔نماز کے بعد تمام لوگ اپنے قریبی لوگوں سے ملتے ہیں اور پکوان کھا کر تہوار کا مزہ لیتے ہیں۔ عید مسلمانوں کے لیے خوشی کا تہوار ہے یہ تہوار رمضان کے تیس روزے رکھنے کے بعد آتا ہے ۔

عید کے موقع پر دہلی میں سیکورٹی کے خصوصی انتظامات کئے گئے ہیں۔ اے بی پی نیوز پورٹل کے مطابق اسپیشل سی پی دیپیندر پاٹھک نے کہا کہ جامع مسجد اور اس کے آس پاس کے علاقوں میں سیکورٹی کے وسیع انتظامات کئے گئے ہیں۔ مناسب تعداد میں پولیس فورس تعینات کی گئی ہے۔ انہوں نے کہا کہ امن و امان کی صورتحال کو مدنظر رکھتے ہوئے عید کا تہوار پرامن طریقے سے منایا جائے۔

ادھر کولکتہ میں عید کے موقع پر بڑی تعداد میں لوگوں نے بارش کے درمیان ر نماز ادا کی۔ وہیں بی جے پی لیڈر شاہنواز حسین نے نئی دہلی کی سنسد مارگ مسجد میں نماز ادا کی۔

تلنگانہ کے وزیر اعلی کے. چندر شیکھر راؤ نے مسلمانوں کے مقدس تہوار عید الفطرکے موقع پر مسلمانوں کو اپنی نیک خواہشات پیش کیں ۔ سی ایم کے سی آر نے عید الفطر خوشی، مسرت کے ساتھ منانے اور مقدس دعاؤں کے ساتھ اللہ کی رحمت حاصل کرنے کی خواہش کی۔