جموں و کشمیر: نروال علاقہ میں پٹرول پمپ کے قریب دھماکہ، لوگوں میں دہشت، افرا تفری کا ماحول

جموں و کشمیر کے شہر نروال میں منگل کی صبح ایک پٹرول پمپ کے قریب دھماکہ سے افرا تفری کا ماحول پیدا ہو گیا۔ حالانکہ اس حادثہ میں ابھی تک کسی کے زخمی ہونے کی خبر سامنے نہیں آئی ہے، لیکن علاقے میں دہشت اور افرا تفری کا ماحول ہے۔ دھماکہ کی خبر ملتے ہی پولیس اور فائر بریگیڈ کی ٹیم موقع پر پہنچ گئی اور دھماکہ کی وجہ کے بارے میں پتہ لگایا جا رہا ہے۔

میڈیا رپورٹس کے مطابق دھماکہ منگل کی صبح نروال منڈی کے قریب ایک پٹرول پمپ پر ہوا۔ پولیس افسر نے بتایا کہ پہلی نظر میں یہ شارٹ سرکٹ کا معاملہ معلوم پڑتا ہے، حالانکہ ابھی جانچ کی جا رہی ہے۔ ایک پولیس افسر کا کہنا ہے کہ آواز دھماکہ کی نہیں تھی بلکہ شارٹ سرکٹ ہوا تھا جس سے لوگوں کے درمیان کچھ دیر کے لیے دہشت پھیل گئی۔ پولیس نے اب حالات معمول پر ہونے کی بات بھی کہی ہے۔

افسران نے امکان ظاہر کیا ہے کہ بارش کا پانی انڈر گراؤنڈ بجلی بورڈ میں لیک ہو رہا ہوگا، جس کے بعد شارٹ سرکٹ سے دھماکہ ہو گیا۔ انھوں نے بتایا کہ صبح تقریباً 10 بج کر 50 منٹ پر ہوئے اس دھماکہ سے پٹرول پمپ کے فرش کا ایک حصہ اور پاس میں ایک بینک کے آگے والے حصہ کا ڈھانچہ متاثر ہو گیا۔