’سنسکرت کے لیے 640 کروڑ روپے، کنڑ کے لیے صرف 3 کروڑ روپے کیوں؟‘ جئے رام رمیش کا امت شاہ سے سوال

ہندوستان میں سبھی زبانوں کی تشہیر یکساں طور پر کرنے کے معاملے میں کانگریس پارٹی نے جمعہ کو وزیر داخلہ امت شاہ کو تنقید کا نشانہ بنایا۔ پارٹی کا سوال ہے کہ حکومت آخر کیوں کنڑ زبان کے فروغ پر صرف 3 کروڑ روپے ہی خرچ کر رہی ہے، جبکہ سنسکرت کے لیے 640 کروڑ روپے کا بجٹ رکھا گیا ہے۔ کنڑ کو ہندوستان کی چھٹی شاستریہ زبان کا درجہ حاصل ہے، پھر اس کے ساتھ ایسا سلوک کیوں۔

پارٹی کے سینئر لیڈر جئے رام رمیش نے جمعہ کے روز سوشل میڈیا پلیٹ فارم ٹوئٹر پر لکھا ہے کہ وزیر داخلہ نے اپنے ایک انٹرویو میں کہا تھا کہ ان کی حکومت ملک میں سبھی زبانوں کے فروغ کے لیے کام کرے گی۔ کیا اسی لیے مودی حکومت نے سنسکرت کے لیے 640 کروڑ روپے کا بجٹ رکھا ہے اور کنڑ زبان کے لیے صرف 3 کروڑ روپے کا، جبکہ کنڑ کو ہندوستان کی چھٹی شاستریہ زبان کا درجہ حاصل ہے۔

جئے رام رمیش نے سوال کیا کہ کیا اس لیے اس شخص کو ٹیکسٹ بک رویزن کمیٹی کا چیئرمین بنایا گیا ہے جس نے کرناٹک کی اسٹیٹ اینتھم کیومپو کی برائی کی تھی۔ کیا اس لیے فوریسٹ کنزرویشن بل 2022 میں انگریزی الفاظ کو ہٹا کر ناموں کو ہندی زبان میں لکھ دیا گیا؟ انھوں نے کہا کہ ’’میرے پاس ایک طویل فہرست ہے عزت مآب وزیر داخلہ جی، آپ اس شخص کے لیے کام کرتے ہیں، جس کا منتر ہے اَستیہ میو جیتے۔‘‘

جئے رام رمیش کا یہ ٹوئٹ امت شاہ کے اس بیان پر آیا ہے جس میں انھوں نے کہا تھا کہ ان کی حکومت صرف ہندی زبان کی تشہیر نہیں کر رہی ہے بلکہ ان کا دھیان ملک کی تمام اہم زبانوں پر ہے۔ یہ بات بھی غور کرنے والی ہے کہ کانگریس پارٹی کی طرف سے یہ سوال اس وقت اٹھایا گیا ہے جب دونوں پارٹی کرناٹک اسمبلی انتخاب کے لیے کمر کس چکی ہے۔

واضح رہے کہ کرناٹک میں 224 اسمبلی سیٹوں پر انتخاب 10 مئی کو ہونا ہے اور 13 مئی کو ووٹ شماری ہونی ہے۔ کانگریس نے اپنے انتخابی منشور میں پانچ اہم وعدوں کو شامل کیا ہے، جن میں گرہ جیوتی (200 یونٹس تک مفت بجلی)، گرہ لکشمی (گھر کی ذمہ دار خاتون کو ہر ماہ 2000 روپے)، اَنّ بھاگیہ- غریب لوگوں کو 10 کلو تک اپنی پسند کی خوردنی اشیا (چاول، جوار، دال وغیرہ) دینا شامل ہے۔