مغربی دہلی لوک سبھا سیٹ پر بی جے پی کے لیے ہیٹ ٹرک لگانا مشکل، بھاری پڑ سکتے ہیں انڈیا اتحاد کے امیدوار مہابل مشرا

نئی دہلی: مغربی دہلی پارلیمانی حلقہ سے انڈیا اتحاد اور عام آدمی پارٹی کے تجربہ کار امیدوار مہابل مشرا میدان میں ہیں۔ ان کا مقابلہ بی جے پی امیدوار کمل جیت سیراوت سے ہے۔ اس پارلیمانی حلقہ کے پچھلے انتخابات پر نظر ڈالیں تو یہاں گزشتہ دو انتخابات سے بی جے پی اپنا سکّہ جمائے ہوئے ہے۔ اس سیٹ کی سب سے بڑی خاصیت یہ ہے کہ جب بی جے پی نے 2014 اور 2019 کے الیکشن میں دہلی کی تمام سیٹیں جیتی تھیں تو اسی سیٹ پر اسے سب سے بڑی جیت ملی تھی۔ دونوں ہی انتخابات میں بی جے پی لیڈر پرویش ورما میدان میں تھے۔ اس بار بی جے پی نے ان کا ٹکٹ کاٹ دیا ہے۔

دہلی میں انڈیا اتحاد کے تحت یہ سیٹ عام آدمی پارٹی کے حصے میں آئی ہے۔ عام آدمی پارٹی نے یہاں سے مہابل مشرا کو اپنا امیدوار بنایا ہے۔ مہابل مشرا 2009 سے 2014 تک اس سیٹ سے رکن پارلیمنٹ رہ چکے ہیں۔ اس سے قبل وہ 3 بار رکن اسمبلی اور ایک بار کونسلر بھی رہے ہیں۔ یعنی اپنے طویل سیاسی تجربات کی بنیاد پر مغربی دہلی پارلیمانی حلقہ سے مہابل مشرا بی جے پی پر بھاری پڑ سکتے ہیں۔

2024 کے لوک سبھا الیکشن میں یہ بات بھی دھیان میں رکھنے کی اشد ضرورت ہے کہ لوگ اس الیکشن کو شخصیت پرستی کے نظریہ سے نہیں بلکہ اپنے مستقبل اور علاقائی مسائل سے جڑے ایشوز کو دھیان میں رکھ کر دیکھ رہے ہیں اور ووٹ بھی اپنی زندگی سے جڑے مسائل پر ہی ڈالیں گے۔ اس طرح مہابل مشرا اس سیٹ پر بھاری ووٹوں سے کامیابی کا پرچم لہرا سکتے ہیں۔ دراصل مہابل مشرا مغربی دہلی کا جانا پہچانا نام ہے۔ وہ اپنی انتخابی ریلیوں، جلسوں، لوگوں سے ملاقاتوں میں کام کے نام پر ووٹ مانگ رہے ہیں۔ ساتھ ہی وہ انڈیا اتحاد کے پیغام کو بھی لوگوں تک پہنچا رہے ہیں۔ ایک بات یہ بھی ہے کہ مغربی دہلی پارلیمانی حلقہ میں 10 اسمبلی حلقے آتے ہیں اور ان سبھی میں عام آدمی پارٹی نے قبضہ جمایا ہوا ہے۔ انڈیا اتحاد کے لیڈران کا اس سیٹ سے مہابل مشرا کو چناوی میدان میں اتارنا سود مند ثابت ہو سکتا ہے۔

قومی آواز کے نمائندہ نے مغربی دہلی کے پارلیمانی حلقہ میں دورہ کیا اور عام لوگوں کی آرا جاننے کی کوشش کی۔ اس دوران یہ سمجھنے کی کوشش ہوئی کہ عوام 2024 کے الیکشن کو کس نظریہ سے دیکھ رہے ہیں اور کن کن ایشوز پر ووٹ ڈالیں گے۔ لوگوں کا ماننا ہے کہ عام آدمی پارٹی نے کام کیا ہے، لوگوں سے کیے وعدے پورے کیے ہیں۔ اس لیے وہ پارلیمنٹ میں عام آدمی پارٹی کے نمائندے کو کامیاب بنا کر بھیجیں گے۔ لیکن وہیں کچھ لوگوں پر مودی میجک کا اثر اب بھی برقرار ہے۔

مغربی دہلی کی رہائشی سربجیت کور نے نمائندہ کو بتایا کہ لوگ روزگار، مہنگائی سے تنگ آ چکے ہیں اور بی جے پی کے چہرہ سے نقاب اتر چکا ہے۔ اس لیے لوگ اسی امیدوار کو ووٹ دیں گے جو لوگوں کے مسائل کی بات کرے اور ان کے لیے کام کرے۔ ویشنو گارڈن میں رہنے والے محمد راقم کا کہنا ہے کہ ہمارے علاقے میں مسلمانوں کی کثیر آبادی ہے اور لوگ مہابل مشرا کے کام کو بخوبی جانتے ہیں۔ اس لیے مسلمانوں کا تقریبا 100 فیصد ووٹ مشرا جی کو ملنے والا ہے۔ چونکہ انہوں نے کبھی تفریق سے کام نہیں کیا، اس لیے انھیں اس انتخاب میں فائدہ ملے گا۔

مغربی دہلی پارلیمانی حلقہ کی ووٹر کلوندر کور نے بھی موجودہ حالات اور عوامی مسائل کا تذکرہ کیا۔ انھوں نے کہا کہ اس میں کوئی دو رائے نہیں کہ لوگ پریشان ہیں، پڑھے لکھے نوجوان اپنی ڈگریاں لیے ہوئے گھروں میں بے کار بیٹھے ہیں اور ان کو ملازمت نہیں مل رہی۔ وہیں دوسری طرف بچوں کے والدین بھی پریشان ہیں، لاکھوں روپے خرچ کرنے کے باوجود ان کا بچہ کامیاب نہیں ہو پا رہا ہے۔ اس لیے لوگوں میں بی جے پی کے تئیں غصہ ہے اور یہ غصہ ووٹ کے ذریعہ باہر آئے گا۔

بہرحال، قومی آواز کے نمائندہ نے مہابل مشرا سے موجودہ حالات اور انتخابی تیاریوں سے متعلق خصوصی گفتگو کی۔ نیچے پیش ہیں اس گفتگو کے اہم اقتباسات...