’حضرت خواجہ غریب نوازؒ کی شانِ اقدس میں گستاخی ناقابل برداشت‘

حیدرآباد: مولانا محمد محسن پاشاہ انصاری قادری نقشبندی مجددی جنرل سکریٹری کل ہند سنی علماء مشائخ بورڈ نے صحافی امیش دیوگن کی جانب سے حضرت خواجہ غریب نوازؒ کی شأن اقدس میں کی گئی گستاخی کی شدید الفاظ میں مذمت کرتے ہوئے کہا کہ حضرت خواجہ صاحب کے چاہنے والے ساری دنیا میں رہتے اور بستے ہیں جو سوشل میڈیا کے ذریعہ اپنی جانب سے شدید و پرزور الفاظ میں مذمت کر رہے ہیں۔

انہوں نے بلا لحاظ مذہب وملت حضرت خواجہ غریب النواز رحمۃ اللہ کے عقیدت مندوں کی جانب سے ملک کے مختلف مقامات پر پولیس اسٹیشنوں میں دائر کردہ معاملات کو خوش آئند قرار دیتے ہوئے کہا کہ امیش دیوگن پر غداری کا معاملہ درج کیا جائے۔

انہوں نے کہا کہ حضرت خواجہ غریب النوازؒ کے آستانے پر آٹھ صدیوں سے زائد عرصہ سے امن وامان کے متلاشی حاضری دیتے ہوئے علمی، روحانی فیضان سے مالا مال ہو رہے ہیں اور تا قیام قیامت ہوتے رہیں گے۔ انہوں نے کہا کہ حضرت خواجہ غریب نوازؒ کے عقیدت مندوں کے دلوں کو ٹھیس پہنچانے والے صحافی کو سخت سے سخت سزا دی جائے تاکہ وہ دوبارہ اس تعلق سے لب کشائی کی ہمت نہ کرسکے۔

مولانا نے مزید کہا کہ امیش کے خلاف فوجداری معاملات کے اندراج کے لئے مذہبی، سیاسی، سماجی، ملی اور غیرسرکاری تنظیموں کے علاوہ ممتاز علمائے کرام و مشائخ عظام کی پہل قابل مبارکباد ولائق صد ستائش ہے یہی وجہ ہے کہ امیش دیوگن اینکر فرضی معذرت نامہ کا بہانہ تلاش رہے ہیں ہم چاہتے ہیں کہ ان پر غداری کا معاملہ چلایا جائے۔