اتر پردیش میں آپ منا سکتے ہیں نئے سال کا جشن، لیکن...

لکھنؤ: اترپردیش کے میں 31 دسمبر کی رات اور یکم جنوری کو نئے سال کا جشن منانے کے لئے کورونا کے سلسلے میں جاری کیے گئے ضروری احکامات پر پوری طرح سے عمل لازمی ہوگا۔ کسی بھی قسم کے جشن کے لئے پولس سے اجازت لینی ہوگی۔ اس کے علاوہ پروگرام میں 100 سے زیادہ لوگ شرکت نہیں کرسکیں گے۔

اترپردیش کے چیف سکریٹری آرکے تیواری نے سینئر پولیس افسران کو اپنے لکھے خط میں کہا کہ اپنے اضلاع میں پروگرام کے دوران کووڈ پروٹوکول پر سختی سے عمل کو یقینی بنائیں۔ کھلی جگہ پر انعقاد ہونے پر اہلیت کے 40 فیصدی افراد ہی اس میں شرکت کرسکیں گے۔ انہوں نے اپنے خط میں لکھا ہے کہ نئے سال کے موقع پر منایا جانے والا کوئی بھی پروگرام متعلقہ اضلاع کے ڈسٹرکٹ مجسٹریٹ اور ایس پی کو مطلع کرنے کے بعد ہی منعقد کیے جائیں گے۔ اجازت لیتے وقت ہی پروگرام کنوینر کا نام پتہ، موبائل نمبر حاصل کر کے اس کی فہرست سازی کرلی جائے اور ان سے پروگرام میں شرکت کرنے والے افراد کی ممکنہ تعداد بھی حاصل کرلی جائے۔

پروگرام کنوینر کو پروگرام کے سلسلے میں کووڈ۔19 سے بچاؤ سے متعلق ہدایات سے اچھی طرح سے آگاہ کر دیا جائے۔ یہ بھی واضح کردیا جائے کہ پروگرام کے دوران کووڈ پروٹوکول اور گائیڈلائنس پر عمل درآمد کی ذمہ داری انہیں کی ہوگی۔ کسی بند مقام جیسے ہال یا کمرے میں پروگرام ہونے کی صورت میں متعینہ اہلیت کے مطابق 50 فیصدی لیکن ایک وقت میں زیادہ سے زیادہ 100 افراد ہی رہ سکتے ہیں، اس کے علاوہ ماسک، جسمانی فاصلہ، تھرمل اسکریننگ، سینیٹائز اور ہینڈ واش کی دستیابی لازمی ہوگی۔