جبل پور میں گیس سے بھری مال گاڑی کی دو بوگیاں پٹری سے اتریں، بڑا حادثہ ٹلا

جبل پور: مدھیہ پردیش کے جبل پور میں منگل کی رات ایک بڑا حادثہ ٹل گیا، جہاں مائع پٹرولیم گیس سے لدی ایک مال گاڑی کی دو بوگیاں پٹری سے اتر گئیں۔ محکمہ ریلوے سے موصولہ اطلاع کے مطابق مغربی وسطی ریلوے کے جبل پور ڈویژن میں جبل پور سے تقریباً 40 کلومیٹر دور واقع شاہ پورہ گیس پلانٹ ہے۔ ایل پی جی سے لدی ایک مال گاڑی منگل کی رات یہاں پہنچی۔ مال گاڑی کی دو بوگیاں اس وقت پٹری سے اتر گئیں جب اسے پیچھے کی طرف لایا جا رہا تھا۔

بتایا گیا ہے کہ مال گاڑی گیس فیکٹری کے اندر موجود ریک کو خالی کرنے جا رہی تھی کہ اس دوران دو بوگیاں پٹڑی سے اتر گئیں۔ جس کی وجہ سے مین لائن کے آپریشن میں کوئی رکاوٹ نہیں آئی ہے۔ یہ مال گاڑی 40 بوگیوں کی تھی جو بھارت پٹرولیم گیس سے بھری ہوئی تھی۔ بوگیاں پٹڑی سے اترتے ہی سائرن بج گیا اور محکمہ ریلوے کا عملہ موقع پر پہنچ گیا۔