ہریانہ میں احتجاج کر رہے کسانوں پر پولیس کا لاٹھی چارج، کانگریس کا برہمی کا اظہار، کہا- ’بی جے پی کا کسان مخالف چہرہ سامنے آیا‘

نئی دہلی: کانگریس نے بھارتیہ جنتا پارٹی (بی جے پی) کی حکومت کو کسان مخالف قرار دیتے ہوئے کہا ہے کہ یہ صرف امیروں کے لیے کام کرتی ہے اور اسے غریبوں، پہلوانوں، جوانوں اور کسانوں کی سے کوئی پرواہ نہیں ہے۔

خیال رہے کہ ہریانہ کے کروکشیتر میں کسانوں نے سورج مکھی کی کم از کم امدادی قیمت کا مطالبہ کرتے ہوئے دہلی-چندی گڑھ-امرتسر ہائی وے پر جام لگا دیا تھا۔ جب کسانوں نے شاہراہ نہیں چھوڑی تو رات 9 بجے کے قریب پولیس نے کسانوں پر طاقت کا استعمال کیا۔ رپورٹ کے مطابق ہریانہ پولیس نے کسانوں پر لاٹھی چارج اور واٹر کینن کا استعمال کیا۔ پولیس کی کارروائی میں 10 کسان زخمی ہوئے ہیں جو اسپتال میں داخل ہیں۔ اس واقعہ پر کانگریس نے سخت برہمی کا اظہار کیا ہے۔

بدھ کو یہاں پارٹی ہیڈکوارٹر میں ایک پریس کانفرنس سے خطاب کرتے ہوئے کانگریس کے ترجمان دیپیندر سنگھ ہڈا نے کہا کہ مودی حکومت کسان مخالف ہے اور منگل کو ہریانہ کے کروکشیتر میں شاہ آباد میں کسانوں کے خلاف اس کی بربریت نے ثابت کر دیا کہ بی جے پی کا کسانوں اور ان کے مسائل سے کچھ لینا دینا نہیں ہے۔

دیپیندر سنگھ ہڈا نے کہا ’’یہ واضح ہو گیا ہے کہ یہ حکومت نہ کسانوں کی ہے، نہ جوانوں کی، نہ ہی پہلوانوں کی، یہ حکومت صرف امیروں کی ہے۔ بی جے پی حکومت کا نعرہ ہے- ’’پٹے کسان، جئے دھنوان۔‘‘ ہڈا نے کہا کہ ہریانہ پولیس نے جس طرح شاہ آباد میں کسانوں کے ساتھ بربریت کا مظاہرہ کیا وہ ہمیں برطانوی دور حکومت کی بربریت کی یاد دلاتا ہے۔ انہوں نے کہا کہ مدھیہ پردیش کے مندسور میں کسانوں پر ہونے والے مظالم کی چھٹی برسی پر کسان شاہ باد میں یکجا ہوئے تھے لیکن پولیس نے جس بے دردی سے ان پر لاٹھی چارج کیا اس سے اس کا کسان مخالف چہرہ واضح ہوتا ہے۔

انہوں نے کہا کہ اس لاٹھی چارج میں کئی کسان زخمی ہوئے ہیں۔ دس کسان اسپتال میں داخل ہیں اور کئی کو حراست میں رکھا گیا ہے۔ اس واقعہ سے صاف ہو گیا ہے کہ یہ حکومت کسانوں کے لیے نہیں ہے، یہ صرف امیروں کے لیے کام کرتی ہے۔ لال بہادر شاستری نے جئے جوان جئے کسان کا نعرہ دیا تھا لیکن بی جے پی نے اس نعرے کو’جئے دھنوان‘ میں بدل دیا۔

(یو این آئی ان پٹ کے ساتھ)