رحم کی درخواست نہیں کروں گا، جو سزا ملے گی وہ منظور: پرشانت بھوشن

نئی دہلی: توہین عدالت معاملہ میں قصوروار قرار دیئے گئے سینئر ایڈوکیٹ پرشانت بھوشن کی سزا پر جمعرات کے روز بحث کی گئی۔ میڈیا رپورٹ کے مطابق سماعت کے دوران پرشانت بھوشن نے اپنی دلیل میں بابائے قوم مہاتما گاندھی کا تذکرہ کرتے ہوئے کہا کہ اگر وہ بولنے میں ناکام رہے تو یہ فرائض کی توہین ہوگی۔

سینئر وکیل پرشانت بھوشن نے کہا، ’’تکلیف اس بات کی ہے کہ مجھے اس عدالت کی توہین کا قصوروار ٹھہرایا گیا جس کی عظمت کی تعریف میں نے ایک درباری یا واہ وہی کے طور پر نہیں کی بلکہ 30 برسوں سے ایک سرپرست کے طور پر بنائے رکھنے کی کوشش کی۔‘‘

پرشانت بھوشن نے مزید کہا، ’’میں صدمہ میں ہوں اور اس بات سے مایوس ہوں کہ عدالت اس معاملہ میں میرے ارادوں کا کوئی ثبوت پیش کیے بغیر نتیجہ پر پہنچ گئی۔ عدالت نے مجھے شکایت کی کاپی تک فراہم نہیں کی۔ میرے لئے یہ یقین کرنا مشکل ہو رہا ہے کہ عدالت نے پایا کہ میرے ٹوئٹ نے ادارے کی بنیاد کو غیر مستحکم کرنے کی کوشش کی۔‘‘

پرشانت بھوشن نے کہا کہ ’’جمہوریت میں کھلے طور پر تنقید ضروری ہے۔ ہم ایسے وقت میں رہ رہے ہیں جب آئینی اقدار کو سنجو کر رکھنا ذاتی سکون سے زیادہ اہم ہونا چاہیے۔ بولنے میں ناکام ہونا فرائض کی توہین ہوگی۔ یہ میرے لئے بہت ہی برا ہوگا کہ میں اپنے مصدقہ تبصرے کے لئے معافی مانگتا رہوں۔‘‘ پرشانت بھوشن نے مہاتما گاندھی کے بیان کا ذکر کرتے ہوئے کہا، ’’میں رحم کی درخواست نہیں کرتا۔ میرے مصدقہ بیان کے لئے کورٹ کی طرف سے جو سزا ملے گی، وہ مجھے منظور ہے۔‘‘