حیدرآباد: ٹماٹر اور پیاز کی قیمتوں میں ایک مرتبہ پھر اضافہ

حیدرآباد: شہر حیدرآباد میں ٹماٹر اور پیاز کی قیمتوں میں ایک مرتبہ پھر اضافہ دیکھا جا رہا ہے۔ پچھلے کچھ دنوں سے سبزیوں کی قیمتیں روز بروز بڑھ رہی ہیں، جس کی وجہ سے عام آدمی پریشان ہے۔ تازہ طور پر پیاز کی قیمتوں میں اچھال دیکھا جا رہا ہے۔ 100روپئے میں 5 تا 6 کیلو کے حساب سے فروخت کی جا نے والی پیاز، اب فی کیلو 40 تا 50 روپئے میں فروخت ہو رہی ہے۔ قیمتوں میں غیر معمولی اضافہ سے عام آدمی پریشان ہے۔

تاجروں کا کہنا ہے کہ تلنگانہ کے اضلاع سے حیدرآباد کو ٹماٹر کی فراہمی میں شدید کمی آئی ہے۔ حالیہ بارش کی وجہ سے فصلوں کو نقصان ہوا ہے اور طلب کی تکمیل نہیں ہو پا رہی ہے۔ موجودہ طور پر ریٹیل مارکٹ میں ایک کلو ٹماٹر کی قیمت 60 سے 70 روپے کے لگ بھگ ہے۔ حیدرآباد کے بازاروں میں عام طور پر روزانہ 150 سے 180 لاری ٹماٹر درآمد کیا جاتا ہے، لیکن اب تاجروں کا کہنا ہے کہ فصلوں کے نقصان کی وجہ سے یومیہ 80 لاریاں بھی حیدرآباد نہیں آ رہی ہیں جس کے سبب ٹماٹر کی قیمتوں میں اضافہ درج کیا جا رہا ہے۔

تاجروں نے بتایا کہ حالیہ بارش کی وجہ سے پیاز کی فصل کو بھی نقصان پہنچا ہے جس سے اس کی قیمت میں اضافہ ہوا ہے۔ مہاراشٹر سے تلنگانہ کے لئے اس کی سپلائی بھی بہت کم ہوگئی ہے۔ تلنگانہ کے اضلاع میں پیازکی فصل کو بارش کی وجہ سے نقصان پہنچا ہے۔ تاجروں کا کہنا ہے کہ ایسی صورتحال مزید ایک ماہ تک برقرار رہے گی۔